Ո՞վ է լինելու Հայաստանի վարչապետը 2018-ից հետո

ԱԺ ապրիլի 2-ին կայանալիք ընտրությունների արդյունքում ձևավորվելու է ոչ միայն Ազգային Ժողովը, այլև ուրվագծվելու է այն կառավարությունը, որը մենք ունենալու ենք 2018 թ. ապրիլից հետո: Այսինքն այն բանից հետո, երբ կավարտվեն Սերժ Սարգսյանի նախագահական լիազորությունները:

Հաշվի առնելով այն զարգացումները, որոնք տեղի են ունենում վերջին շրջանում՝ մենք կարող ենք նշել, որ իշխանության հայտ իրականում ներկայացրել են երեք քաղաքական ուժեր՝ Հանրապետական կուսակցությունը, «Ծառուկյան դաշինքը» և «Օհանյան-Րաֆֆի-Օսկանյան» դաշինքը: Նշված այս երեք ուժերի մեջ էլ պետք է փնտրել հայաստանի վարչապետին, որն իր լիազորությունները կստանձնի 2018 թ.:

Սերժ Սարգսյանի վարչապետի թեկնածուն

Հաշվի առնելով Սերժ Սարգսյանի մղումները և իր կողմից անցած քաղաքական ուղին՝ հստակ կարող ենք նշել, որ նա պատկանում է այն քաղաքական գործիչների դասին, որոնք ժառանգորդ չեն կարող ունենալ և որոնք ձգտում են իշխանության ղեկը միշտ իրենց ձեռքում պահել: իսկ եթե սրան գումարենք փետրվարի 20-ին ԶՈՒ ղեկավար կազմի օպերատիվ հավաքի մասնակիցների հետ հանդիպման ժամանակ Սերժ Սարգսյանի արած հայտարարությունները, կարող ենք միանշանակ պնդել, որ Սարգսյանի վարչապետի թեկնածուն հենց ինքն է և նրա նպատակը ապրիլի 2-ին կայանալիք ընտրությունների արդյունքում այն է, որ նա կարողանա այնպիսի հնազանդ ԱԺ ձևավորի, որը 2018-ին կառաջադրի Սերժ Սարգսյանի թեկնածությունը վարչապետի պաշտոնում:

ՀՀԿ-ի վարչապետի թեկնածուն

Որքան էլ իշխանական քարոզչամեքենան փորձի հակառակում համոզել, իրականությունն այն է, որ ՀՀԿ-ում չկա միասնական կարծիք, թե ով է լինելու ՀՀ վարչապետի թեկնածուն 2018 թ.-ից հետո: Այսօր արդեն կարելի է ասել, որ առնվազն մեկ հոգի ՀՀԿ-ում կա, ով կարող է և հավակնելու է վարչապետի պաշտոնին: Խոսքը գործող վարչապետ Կարեն Կարապետյանի մասին է: Սակայն կկարողանա՞ արդյոք Կարապետյանն իր շուրջ կոնսոլիդացնել Հանրապետականի պրոգրեսիվ զանգվածը, թե ոչ, ցույց կտա միայն ժամանակը:

«Ծառուկյան դաշինքի» վարչապետի թեկնածուն

Հայտնի է որ ԲՀԿ նախագահ Գագիկ Ծառուկյանը հանդիսանում է մեր երկրում ամենամեծ ժողովրդականությունը վայելող քաղգործիչներից մեկը, և տրամաբանական կլինի կարծել, որ «Ծառուկյան դաշինքի» վարչապետի թեկնածուն հենց Գագիկ Ծառուկյանն է: Սակայն Ծառուկյանը բազմիցս ընդգծել է, որ ինքն անձամբ չի ձգտում որևիցե պաշտոն զբաղեցնելու և որ պաշտոնը երբեք իր համար ինքնանպատակ չի եղել: Հետևաբար, կարող ենք նշել, որ հաջողության պարագայում «Ծառուկյան դաշինքը»՝ որպես վարչապետի թեկնածու կարող է առաջադրել մեկ այլ գործչի:

«Օհանյան-Րաֆֆի-Օսկանյան» դաշինքի վարչապետի թեկնածուն

Ի տարբերություն նախորդ երկու քաղաքական ուժերի այս դաշինքում վաղուց արդեն հայտնի է վարչապետի թեկնածուի անունը: Խոսքը Սեյրան Օհանյանի մասին է: Այսօր նաև պարզ է, թե ի՞նչ հռետորաբանություն է ունենալու դաշինքն ընտրություններին: Կենտրոնական հարցերն են լինելու երկրի ռազմաքաղաքական զարգացումը, ԼՂ հարցում իրավիճակի կայունացումը, ինչպես նաև մեծ սոցիալական ծրագրի իրականացումը, որը շուտով կներակայցվի հանրության դատին և որն իր մեջ ներառելու է բազում ոլորտներ՝ սկսած մայրական կապիտալի ներառումից մինչև ԱԱՀ նվազեցում:

Իսկ թե վերջում ով կլինի Հայաստանի նոր վարչապետը կախված է լինելու բազում գաղափարներից, և առաջին հերթին նրանից թե ուժերի ինչ դասավորություն ենք մենք ունենալու ապրիլի 3-ին

Արմեն Միքայելյան