«Մինչև էս լկտիությունները չվերանան¸ ես ոչ մի ընտրության չեմ հավատա». Ա. Իսպիրյան

Երգիչ Արթուր Իսպիրյանը որևէ դրական ակնկալիք չունի ապրիլին սպասվող խորհրդարանական ընտրություններից: Նրա կարծիքով քաղաքական դաշտը որակական լուրջ փոփոխության կարիք ունի:

«Ես չեմ հասկանում՝ ինչ է կատարվում և ով ում բարեկամն է: Նորից նույն անուններ են առաջադրվելու¸ ովքեր իրենց գործով¸ մակարդակով ցույց են տվել¸ որ ոչինչ չի փոխվի: Եթե ժողովուրդը նորից կաշառքներ վերցնի և ընտրի նույն դեմքերին¸ ապա անիմաստ են այս ընտրությունները: Պետք է որակապես լրիվ փոխվի¸ պետք է ազնիվ մարդիկ ընտրվեն»¸-Zham.am-ի հետ զրույցում ասաց Իսպիրյանը:

Նրա կարծիքով ժողովրդի մոտ մեծ հիասթափություն կա քաղաքական գործիչներից՝ նրանց անկայուն քաղաքական սկզբունքների պատճառով: Այս պարագայում շատերը պարզապես չեն կողմոնորվում¸ թե ում կարելի է վստահել: Իրական ընտրությունների հանդեպ հավատը կոտրվում է նաև թաղային հեղինակությունների մասնակցության պատճառով:

«Մինչև թաղային հեղինակությունները չհասկանան¸ որ սխալ գործ են անում¸ մինչև էս լկտիությունները չվերանան¸ես ոչ մի ընտրության չեմ հավատա»¸-ընդգծեց Իսպիրյանը:

Ապրիլի 2-ին Ազգային ժողովի ընտրություններ նշանակելը շատերի կարծիքով սրբապղծություն էր: Իսպիրյանը համամիտ է այս տեսակետին: Նրա խոսքով¸ այդ օրը հայ ազգի համար սև օր է և ճիշտ կլիներ այլ օր նշանակել:

«Իրոք որ սրբապղծություն է¸ ճիշտ օր չեն ընտրել դրա համա. այդ օրը սև օր է մեզ համար և չգիտեմ՝ ինչու՞ են այդ օրը որոշել: Ի՞նչ էր խանգարում¸ որ 2-ին չլիներ¸ 12-ին լիներ»¸-նկատեց նա:

Անի Շաբոյան

Լուսանկարը՝ bravo.am-ի

Zham.am