Վաչագան Ղազարյանի փաստաբանը Վերաքննիչում բողոքարկել է նրա կալանքը երկարաձգելու որոշումը

Հայաստանի երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանի պաշտպան Արմեն Հարությունյան Վերաքննիչ քրեական դատարանում բողոքարկել է իր պաշտպանյալի կալանքի ժամկետը երկարացնելու վերաբերյալ առաջին ատյանի դատարանի որոշումը։ Այդ մասին փաստաբանը հայտնել է  «Ազատության» հետ զրույցում։

Դատարանի որոշումը Հարությունյանը մեկնաբանեց որպես «չհիմնավորված, ոչ օրինական որոշում»։ «Դատարանը ընդհանրապես հաշվի չառավ պաշտպանական կողմի ներկայացրած փաստարկները, իսկ փաստարկները բավականին ծանրակշիռ էին», - ասաց փաստաբանը:

Հարցին էլ, որ Ղազարյանը հայտարարություն էր տարածել՝ իր և ընկերոջ անունից պատրաստակամություն հայտնելով մոտ 6 միլիոն դոլար փոխանցել պետությանը, այս մասով արդյոք որևէ ընթացք տրվե՞լ է, Հարությունյանն արձագանքեց. - «Որևէ նոր բան չկա, ընթացքի մասին ոչ մի նորություն չունեմ, հայտարարությունն էլ ուժի մեջ է»։

Ապօրինի հարստացման մեջ մեղադրվող Վաչագան Ղազարյանը մեկ անգամ արդեն կալանավորվել էր ամռանը, ապա 1 միլիարդ դրամ գրավով ազատ էր արձակվել։ Երկրորդ անգամ նա կալանավորվեց նոյեմբերի 15-ին՝ Վճռաբեկ դատարանի որոշմամբ: Առաջին ատյանի դատարանը դեկտեմբերի 13-ին բավարարեց կալանքը երկարաձգելու նախաքննական մարմնի միջնորդությունը։