Դատախազությունը բողոքարկել է Արմեն Գեւորգյանին չկալանավորելու՝ դատարանի որոշումը

ՀՀ գլխավոր դատախազությունը Մարտի 1-ի գործով մեղադրյալ Արմեն Գեւորգյանի նկատմամբ խափանման միջոց կալանավորումն ընտրելու նախաքննական մարմնի միջնորդությունը մերժելու դատարանի որոշման դեմ վերաքննիչ բողոք է ներկայացրել:

Այս մասին armtimes.com-ին հայտնել է ՀՀ գլխավոր դատախազի խորհրդական Գոռ Աբրահամյանը:

Հիշեցնենք, որ ըստ դատարանի այդ որոշման՝ Արմեն Գեւորգյանը չկալանավորվեց՝ այդպիսով մերժելով նախաքննական մարմնի միջնորդությունը՝ նրան երկու ամսով կալանավորելու վերաբերյալ: Երեւան քաղաքի ընդհանուր իրավասության դատարանն այդ որոշումը կայացրել էր դեկտեմբերի 14-ին:

Արմեն Գեւորգյանին մեղադրանք է առաջադրվել ՀՀ ՔՕ մի քանի հոդվածներով: Մասնավորապես՝ նա մեղադրվում է ՀՀ Քրեական օրենսգրքի 311 հոդվածի 4-րդ մասի 2-րդ կետով (պաշտոնատար անձի կողմից առանձնապես խոշոր չափերի կաշառք ստանալը), ՀՀ ՔՕ 190 հոդվածի 3-րդ մասի 1-ին կետով (փողերի լվացում, որը կատարվել է առանձնապես խոշոր չափերով) ՀՀ ՔՕ 38-300.1 հոդվածի 1-ին մասով (սահմանադրական կարգի տապալմանը օժանդակելը) եւ արդարադատության կայացմանը խոչընդոտելու համար: