Ղարաբաղի ներկայացուցիչը փաստացի հեգնել է Մամեդյարովի ու Մնացականյանի համատեղ համաձայնությանը (Տեսանյութ)

Մամեդյարովի հայտնի ոգևորված հայտարարությունն այն մասին, թե «Ղարաբաղյան կարգավորման հարցում վերջապես ընդհանուր ըմբռնում է առաջ եկել Զոհրաբ Մնացականյանի հետ», բնականաբար չէր կարող անարձագանք մնալ նաև Ղարաբաղում:

Այդ հարցում ամենակրեատիվ և սրամիտ արձագանքը եղել է Բակո Սաակյանի մամլո խոսնակ Դավիթ Բաբայանի կողմից:

Մասնավորապես, պատասխանելով այն հարցին, թե ինչպես է նա վերաբերվում Միլանում ընդունված Մամեդյարովի ու Մնացականյանի համատեղ հայտարարությանը Ղարաբաղի վերաբերյալ, նշել է բառացիորեն հետևյալը:

«Մենք համարում ենք, որ ամեն հանդիպում գործընթացում յուրատեսակ ներդրում է։ Ինչ վերաբերում է Մամեդյարովի հայտարարությանը, ապա կարող ենք ենթադրել, որ առաջին հերթին խոսքն այն մասին է, որ Բաքվում վերջապես գիտակցել են խաղաղ կարգավորման սկզբունքի պահպանման անհրաժեշտությունը։

Երկրորդ, Ադրբեջանը բանակցային գործընթացում պաշտոնական Ստեփանակերտի մասնակցության անհրաժեշտության ընդունման ուղու վրա է։ Եվ երրորդ, Բաքուն պատրաստ է ճանաչել Արցախը:

Եթե կա համապատասխան պայմանավորվածություն եւ այդ անհրաժեշտության ընդունում՝ Ադրբեջանի կողմից, ապա կարելի է խոսել բանակցային գործընթացի նոր որակի մասին»,–նշել է Բաբայանը։

Հասկանալի է, որ Բաբայանը չի հավատում ադրբեջանական կողմի դիրքորոշման փոփոխմանը, քանզի լավ է ճանաչում նրանց և հասկանում է, որ Մամեդյարովի ոգևորությունն այլ ենթատեքստ ունի:

Սակայն դիվանագիտական էտիկետից ելնելով՝ Բաբայանը դա ցույց չի տալիս և ստացվում է, որ իր պատասխանը հեգնանքային բնույթ է ստանում:

Սակայն պետք է նշել, որ այդպես ստացվում է ինքնաբերաբար, և դրա մեղավորը հաստատ Ստեփանակերտը չէ:

Սա է իրականությունը:

Արտակ Հակոբյան