Ինչո՞ւ Կրեմլը չի շտապում շնորհավորել Փաշինյանի հաղթանակը (Տեսանյութ)

Մեր ունեցած խիստ հավաստի աղբյուրների համաձայն, Կրեմլում «սառն են» ընդունել խորհրդարանական ընտրությունների արդյունքները: Կրեմլին մոտ կանգնած աղբուրներից մեկի պնդմամբ գալիք խորհրդարանում Մոսկվայի միակ դաշնակից ուժը լինելու է Ծառուկյանի խմբակցությունը: Ըստ այդ աղբյուրի, Մոսկվայում խիստ նյարդայնացած են այդ հանգամանքով:

Հենց դրանով էր պայմանավորված նաև այն, որ հայաստանյան ընտրությունները ընդհանրապես չլուսաբանվեցին ռուսական գլխավոր հեռուստաընկերություններով:

Նման իրավիճակ վերջին 27 տարիների ընթացքում երբեք չի եղել:

Իսկ ամենա զայրացնողը, ըստ այդ աղբյուրի, եղել է այն, որ չնայած մի շարք անդրկուլիսյան նախազգուշացումների, Փաշինյանը որոշում կայացրեց կալանավորել Ռոբերտ Քոչարյանին: Եվ դա այն դեպքում, երբ իր ծննդյան առթիվ ՀՀ 2-րդ նախագահին շնորհավորել էր անձամբ Պուտինը:

Աղբյուրը հիշեցրեց նաև այն հանգամանքը, որ վերջերս կայացած «Լազարևյան ակումբի» նիստում Երևանում Քոչարյանը պատվավոր հյուրերի շարքում էր գտնվում, մինչդեռ Փաշինյանի թիմը ընդգծված կերպով արհամարհեց այդ ակումբի աշխատանքները և նույնիսկ շարքային ներկայացուցիչ չուղարկեց Զատուլինի մոտ:

Այս ամենը նկատել են Մոսկվայում, և աղբյուրի համաձայն, անպայման հետևություններ են անելու Երևանի հետ հետագա հարաբերությունները կառուցելու ընթացքում:

Փաստորեն ստացվում է, որ Փաշինյանի կողմից «փայլուն» ձևակերպված հայ-ռուսական հարաբերությունները այդքան էլ փայլուն չեն:

Հիշեցնենք, որ ներկա դրությամբ Հայաստանը՝ Վրաստանի, Իրանի, ԱՄՆ-ի հետ իր փոխհարաբերություններում զգալիորեն զիջում է Ադրբեջանի՝ այդ երկրների հետ ունեցած հարաբերություններին:

Միակ հարթակը, որտեղ Հայաստանը ուներ դիրքային առավելություն Բաքվից, դա ԵԱՏՄ-ի ու ՀԱՊԿ-ի երկրներն էին: Բայց այստեղ էլ Բաքուն առաջ է անցել Մինսկի ու Աստանայի հետ փոխհարաբերություններում՝ չլինելով նույնիսկ այդ ակումբի անդամ: Մնացել էր միայն Մոսկվան, սակայն պարզվեց, որ այս հարցում էլ Փաշինյանի «համառ» ջանքերով, այդ փոխհարաբերությունները փչանում և սառն են դառնում օր-օրի:

Ինչ է սա, պատահականության արդյո՞ւնք է, անփորձությո՞ւն է, թե՞ այլ բան, մեր հասարակության համար պարզ կդառնա մոտ ժամանակաշրջանում:

Արտակ Հակոբյան