Փաշինյանը Պուտինի օգնականին սուտասա՞ն է համարում ( Տեսանյութ)

Այն ինչ կատարվեց երեկ, կարելի է գնահատել որպես փոքրիկ դիվանագիտական սկանդալ:

Ինչպես հայտնի է, դեկտեմբերի 6-ին պետք է տեղի ունենար ՀԱՊԿ-ի գագաթաժողովը, որտեղ պիտի որոշվեր այդ կառույցի գլխավոր քարտուղարի հարցը:

Հետո խոսակցություն եղավ, որ այդ գագաթաժողովում Հայաստանը կներկայացնի ոչ թե Փաշինյանը, այլ նրա տեղակալ Արարատ Միրզոյանը: Հետո դա էլ հերքվեց և հայտարարվեց, որ Սանկտ- Պետերբուրգ կգնա Փաշինյանը:

Որից հետո, դեկտեմբերի 2 –ին, նախընտրական հանդիպումներից մեկի ընթացքում Փաշինյանը հայտարարեց, որ Պուտինի հետ զրույցի ընթացքում որոշում են կայացրել հետաձգել այդ գագաթաժողովը, որպեսզի գլխավոր քարտուղարի հարցը լուծվի աշխատանքային հանգիստ պայմաններում: Նպատակը սկանդալից խուսափելն էր, քանզի չէր բացառվում, որ Լուկաշենկոն ու Նազարբաևը կարող էին կոշտ քայլերի դիմել:

Հասկանալի է, որ դա շահավետ չէր լինի ոչ Փաշինյանին, ոչ էլ՝ Պուտինին:

Որից հետո, բրիֆինգներից մեկի ժամանակ, Պուտինի օգնական Ուշակովը հայտարարեց, որ ՀԱՊԿ- ի գագաթաժողովը հետաձգվել է Հայաստանի խնդրանքով:

Եվ ահա, Փաշինյանի օգնականը նպատակահարմար գտավ հակադարձել այս անգամ Պուտինի օգնականին, նշելով, որ այդ գագաթաժողովը չի հետաձգվել Հայաստանի խնդրանքով, և կրկնել է Փաշինյանի խոսքերը:

Այստեղ նույնիսկ կարևոր չէ, թե ով է սուտ խոսում, այլ այն, որ Փաշինյանի օգնականը նպատակահարմար է գտել փաստացի հերքել Պուտինի օգնականին:

Անշուշտ, Պուտինը վերի արտի ցորենը չէ, որ պիտի քննադատության համար տաբու լինի: Խնդիրը կայանում է նրանում, որ ՀԱՊԿ- ի շրջանակներում դիվանագիտական սկանդալից խուսափելու համար Պուտինն ունի ավելի շատ գործիքակազմ, քան՝ Փաշինյանը: Եվ քանի որ այդ սկանդալը առաջին հերթին շահավետ չէ ոչ Երևանին, ոչ էլ՝ Մոսկվային, ուրեմն այդ խնդրի լուծման ճանապարհին անիմաստ կսմթելը Մոսկվային, մեղմ ասած, կոնտրպրոդուկտիվ է, մանավանդ, որ այս ողջ «ճաշը» եփվել է անձամբ Փաշինյանի պատճառով:

Եվ այստեղ է, որ հարց է առաջանում, ի՞նչ նպատակ է հետապնդվում նման գործելաոճով հանդես գալը: 

Այստեղ գործում է միայն անփորձության գործո՞նը, թե այլ ավելի հեռահար խնդիրներ են դրվում, որի մասին դեռ անտեղյակ է հայ հասարակությունը:

Արտակ Հակոբյան