Ռոբերտ Քոչարյանը 0038 գաղտնի հրամանի հետ ծանոթ չէ. պաշտպան

Վերաքննիչ դատարանում ՀՀ 2-րդ նախագահ Ռոբերտ Քոչարյանի խափանման հարցի քննարկման շրջանակներում ներկայացվող միջնորդությունների քննարկման ընթացքում Ռոբերտ Քոչարյանը հայտնում է դիրքորոշումներ, տալիս գնահատականներ: Այս մասին  այսօր լրագրողների հետ ճեպազրույցում հայտարարեց Քոչարյանի պաշտպանական խմբի անդամ Արամ Օրբելյանը։

Փաստաբանը նշեց, որ Քոչարյանը ծանոթ չէ  գործով ապացույց համարվող փաստաթուղթ 0038 հրամանին, որի հիման վրա էլ Քոչարյանին մեղադրանք էր առաջադրվել սահմանադրական կարգը բռնի տապալելու փորձեր կատարելու համար:

«Գաղտնի հրամանի հետ կապված նրա դիրքորոշումը մի քանի անգամ քննարկվել է, ինքն այդ հրամանին ծանոթ չէ։ Գաղտնի հրամանի զուտ տեսքտի հետ ծանոթ չէ։ Այսինքն՝ նախարարները չեն ուղարկում իրենց հրամանները նախագահի հետ համաձայնեցնելու, որովհետև եթե բոլոր նախարարները, նույնիսկ եթե միայն ուժային նախարարները ուղարկեին նախագահին համաձայնեցման կամ ընթերցման, ախա նախագահը ուրիշ այլ գործառույթ չէր կարողանա իրականացնել», - նշեց Օրբելյանը։

Օրբելյանը հավելեց, որ այն  պնդումը, թե բանակը 2008-ին մասնակցել է երկրում ներքաղաքական գործընթացներին, ընդամենը նախաքննություն իրականացնող վարույթի՝ Հատուկ քննչական ծառայության պնդումն է, որն ապացուցված չէ։

Պաշտպանը համաձայն չէ այն դիտարկմանը, թե Քոչարյանն ամեն ինչ  բարդում է պաշտպանության նախկին նախարար Միքայել Հարությունյանի վրա: 

«Ոչ մեկի վրա բարդման գործընթաց չի լինում։ Երբ այդ հրամանի ընդունման հետ կապված շատ հարցեր պարզաբանված կլինեն, նոր միայն կարող ենք հետևություններ անել։ Այս ամբողջ գործընթացի հետ մեր առարկությունն այն է, որ շատ հապճեպ է գործընթացն ընթանում»։

Zham.am