Ադրբեջանական լրատվամիջոցներն ու փորձագետները լայնորեն քննարկում են Փաշինյանի ու ղարաբաղյան իշխանությունների միջև առկա խնդիրները

Նիկոլ Փաշինյանի վերջին քննադատությունը, ուղղված ղարաբաղյան իշխանություններին, լայն արձագանք ստացավ Ադրբեջանում: Այստեղ ուզում են հասկանալ, թե ինչքան խորը կգնա այդ գործընթացը և ինչ հետևանքների կարող է հանգեցնել հայկական երկու կողմի համար:

Ըստ քաղաքագետ Ֆիքրետ Սադիխովի, Փաշինյանը անփորձ գործիչ է և կոնֆլիկտի է գնում Ստեփանակերտի հետ՝ առանց հետին պլաններ ունենալու:

«Նա իր շուրջ ամենուրեք թշնամիներ է ձևավորում: Արևմուտքի հետ որևէ առաջխաղացում չկա, Մոսկվայի հետ հարաբերությունները սառն են, Բալառուսի ու Ղազախստանի հետ հարաբերությունները դառնում են թշնամական: Սա նշանակում է, որ գործ ունենք ինքնասիրահարված նարցիսի հետ, ով իր եսակենտրոն բնավորությամբ բոլորի հետ թշնամանալով Հայաստանը կհասցնի ծանր իրավիճակի»: Ըստ ադրբեջանցի քաղաքագետի, Բաքուն պետք է համբերությամբ սպասի և ճիշտ պահին իր օգուտը քաղի:

Մեկ այլ քաղաքագետի՝ Միլի մեջլիսի պատգամավոր Ռասիմ Մուսաբեկովի կարծիքով Փաշինյանի կոնֆլիկտը ղարաբաղցիների հետ օբյեկտիվ բնույթ ունի: Քանզի ներկայիս ԼՂՀ-ի ղեկավարները ձևավորվել էին դեռ Սերժ Սարգսյանի ժամանակ, և տրամաբանական է, որ Փաշինյանը նրանց հետ վաղ թե ուշ կոնֆլիկտի մեջ պիտի մտներ:

Ըստ Մուսաբեկովի՝ կկարողանա արդյո՞ք դեկտեմբերի 9–ից հետո Փաշինյանը իր մարդկանց իշխանության բերել Ստեփանակերտում, դժվար է ասել: Ըստ Մուսաբեկովի, ղարաբաղցիներն իրեց վերնախավին այդքան էլ չեն սիրում, բայց ավելի շատ չեն վստահում Փաշինյանին, քանզի կասկածում են՝ Ղարաբաղը պաշտպանելու հարցում նրա հնարավորությունների վրա:

Մեկ այլ քաղաքագետ և Մեջլիսի անդամ Սամեդ Սեիդովը կարծում է, որ ժամանակից շուտ չարժե ուրախանալ, քանզի Փաշինյանի մոտ ղարաբաղյան հարցում զիջումների գնալու ցանկություն չկա:

Ըստ նրա, Փաշինյանը պոպուլիստ է, և ուրեմն ապրիորի չի կարող գնալ հայ հանրության համար ոչ պոպուլյար լուծումների:

Սեմիդովի կարծիքով Փաշինյանից դիրքորոշման մեղմացումի սպասելը անպտուղ գործ է: Սակայն նրա անփորձությունից կարող է օգտվել Ադրբեջանը:

Օրինակ, եթե Մոսկվայի հետ հարաբերությունների վատթարացումն անցնի «կարմիր գիծը», ապա Ադրբեջանը կարող է և պետք է օգտվի այդ հանգամանքից:

Մի հարցում բոլոր ադրբեջանցի փորցագետները համակարծիք են, որ Փաշինյանի վարչակազմը ԼՂՀ–ի հարցում հստակ տեսակետներ չունի և բանակցային գործընթացում Բաքուն կարող է և պետք է նախաձեռնությունը վերցնի իր վրա և դիրքային առավելություններ կորզի միջնորդներից:

Ադրբեջանցի փորձագետների քննարկումները ցույց են տալիս, որ Փաշինյանի իշխանության գալուց հետո նրանց մոտ հույսեր էր առաջացել, որ նոր իշխանության պարագայում Երևանում հայկական կողմի դիրքորոշումը կարող էր փոքր ինչ մեղմանալ, մանավանդ, որ Փաշինյանը Տեր-Պետրոսյանի քաղաքական արեալի գործչի համբավ ուներ:

Սակայն այս 7 ամիսների ընթացքում նրանք հիասթափվել են այս հարցում, և միակ հույսը մնացել է Փաշինյանի անփորձությունից օգտվելը:

Zham.am