Իսկ ինչու՞ է պատգամավորի ձերբակալման միջնորդությունը ներկայացվում ընտրություններից մեկ շաբաթ առաջ. Տեսանյութ
Այսօր հայտնի դարձավ, որ Արամ Հարությունյանի ձերբակալման միջնորդության համար գլխավոր դատախազը դիմել է...ԱԺ: Այդ նույն ԱԺ-ին, որի աշխատանքների ավարտին մնացել է ընդամենը մեկ շաբաթ:
Այն, որ Արամ Հարությունյանը, մեղմ ասած, բարի պտուղը չէ, նույնիսկ քննարկման առարկա էլ չէ: Սակայն բոլորի համար էլ պարզ է, որ այս քայլը հատուկ է ընտրված ընտրությունների նախաշեմին, որպեսզի իշխանության թիմը լրացուցիչ քաղաքական բոնուս ստանա:
Նրան կարող էին ձերբակալել մեկ ամիս առաջ, կամ մեկ ամիս հետո: Սակայն իշխանությանը անհրաժեշտ էր, որ դա լիներ հենց ընտրություններից մեկ շաբաթ առաջ:
Սա նշանակում է.
Առաջին
Գործադիր իշխանությունը ամբողջովին և արդեն բացահայտ վերահսկում է դատախազության ողջ համակարգը, ինչը սահմանադրության կոպտագույն խախտում է համարվում:
Երկրորդ
Գլխավոր դատախազն իր այս քայլով գրեթե բացահայտորեն ցույց տվեց, որ կամակատար է դարձել իշխող ուժի ձեռքում:
Անկեղծ ասած, նա կամակատար էր նաև Սերժ Սարգսյանի ձեռքում: Սակայն այսպիսի բացահայտ պահվածքը հուշում է, որ նա այլևս իրավունք չունի շարունակել պաշտոնավարել, իսկ հետագայում նա պետք է պատասխանատվության ենթարկվի իր այս պահվածքի համար, այսինքն՝ Սահմանադրությունը բացահայտորեն և կոպտորեն խախտելու համար:
Երրորդ
Ընդամենը 7 ամիս էլ չդիմացավ երկրի դատաիրավական համակարգի անկախությունը գործադիրից: Մինչդեռ, գոնե հնարավորություն կար, որպեսզի այս համակարգի անկախության գործակիցը ապրիլյան հեղափոխությունից հետո մեծացվեր: Սակայն ավաղ, 7 ամիս անց կարելի է արձանագրել, որ այս համակարգի առողջացման համար նույնիսկ հեղափոխությունը փրկություն չեղավ:
Եվ հեղափոխական խոստումներից այս թեզն էլ մոռացվեց:
Իսկ որոշ ժամանակ անց, երբ էյֆորիան վերջնականապես ավարտվի, մարդիկ հարցնելու են՝ «Իսկ ո՞րն էր հեղափոխության գլխավոր առաքելությունը»:
Արտակ Հակոբյան
Հետևեք մեզ Facebook-ում