Ինչու՞ չեղարկվեց դեկտեմբերի 6 –ի ՀԱՊԿ-ի գագաթնաժողովը . Տեսանյութ

Եվ այսպես, երեկ, իր քարոզարշավի ժամանակ, ՀՀ վարչապետի պաշտոնակատար, «Իմ քայլը» դաշինքի առաջին համար Նիկոլ Փաշինյանը հայտարարեց, որ դեկտեմբերի 6-ի ՀԱՊԿ-ի գագաթնաժողովը հետաձգվում է, և դրա մասին նա խոսել է Պուտինի հետ:

Արդեն չի էլ թաքցվում, որ ՀԱՊԿ-ի անդամ երկրների միջև անհաղթահարելի հակասությունների պատճառով, այս կառույցի գլխավոր քարտուղարի ընտրության հարցը բաց է մնում: Եվ լավ կլինի, որ այն լուծվի աշխատանքային քննարկումների ընթացքում:

Հասկանալի է, որ այդ քննարկումների ժամանակ էլ խնդիրը չի լուծվի, քանզի Փաշինյանի ու Լուկաշենկոի միջև հակասությունները շատ են խորացել:

Գագաթնաժողովը հետաձգվեց, ամենայն հավանականությամբ, մեծ սկանդալից խուսափելու համար: Քանզի բոլորի աչքի առջև կարող էր ցցուն դառնալ այս կառույցում առկա խորը ճգնաժամը:

Իսկ այն, որ այդ ճգնաժամը շատ խորն է, ակներև է: Հայաստանը կատեգորիկ դեմ է, որ գլխավոր քարտուղարի պաշտոնը ժամանակից շուտ անցնի Բելառուսին, իսկ Մինսկն ու Աստանան կատեգորիկ դեմ են՝ ոչ միայն նրան, որ Հայաստանը շարունակի պահպանել այդ պաշտոնը իր ձեռքում, այլև չեն ուզում, որ այն, որպես փոխզիջում, մնա Ռուսաստանին:

Իսկ սա նշանակում է, որ այս կառույցը հայտնվել է լրջագույն ճգնաժամում: Իսկ նախօրեին, Россия-24 –ին տված հարցազրույցում, Բելառուսի նախագահը  հանգստացնում է Մոսկվային, որ Մինսկը մտադրություն չունի դուրս գալ ԵԱՏՄ-ի կազմից և միանալ ԵՄ-ին, քանզի այնտեղ իրենց ոչ ոք չի սպասում:

Լուկաշենկոն ոչինչ չի խոսում ՀԱՊԿ-ի շուրջ ստեղծված իրավիճակի մասին, սակայն իր պարտքն է նշում ասել, որ «Արևմուտքը ջանք չի խնայում հետխորհրդային երկրներին տրոհել և պոկել իրարից»: Թե ում նկատի Լուկաշենկոն, և արդյոք ինչ որ մեկին նկատի ուներ այս միտքն արտահայտելիս, դժվար է ասել:

Արձանագրենք, սակայն, որ ՀԱՊԿ-ի շուրջ կատարվելիք գործընթացները հուշում են՝ այս կառույցը Խաչատուրովի հետկանչից հետո հայտնվեց լրջագույն ճգնաժամի առջև:

Արտակ Հակոբյան