Վրաստանում Սաակաշվիլիի թեկնածուն պարտվեց. Ի՞նչ զարգացում կարելի է սպասել

Ի հեճուկս շատերի կանխատեսումների, Վրաստանում նախագահական ընտրությունների երկրորդ փուլում, ընդիմության ներկայացուցիչ Գրիգոլ Վարշաձեն չկարողացավ հաջողության հասնել: Այն էլ այն դեպքում, երբ նրան աջակցել էր նաև ընտրությունների առաջին փոլում երրորդ տեղը գրաված Բագրաձեն: Սույն հանգամանքը շատերին է զարմացրել: Մանավանդ, որ Սալոմե Զուրաբիշվիլիի հեղինակությունը այդքան էլ բարձր չէր՝ ոչ Թբիլիսիում, ոչ էլ՝ այլ խոշոր քաղաքներում: Ասել, որ իշխանությունների կողմից խոշորամասշտաբ կեղծիքներ են կատարվել, նույնպես չի կարելի: Քանզի ընդդիմությունը լավ էր պատրաստված, ուներ հզոր վերահսկող համակարգեր, և չէր կարող չնկատել խոշորամասշտաբ չարաշահումները:
Հարց է առաջանում, այդ դեպքում ինչո՞վ բացատրել այն փաստը, որ ընտրությունների երկրորդ փուլում նույնպես քաղաքացիների ակտիվությունը մեծ չէր: Հիշեցնենք, որ առաջին փուլում ակտիվությունը չափազանց ցածր ցուցանիշ էր արձանագրել, ընդամենը... 43 տոկոս: Երկրորդ փուլում ակտիվության ցուցանիշը կազմում էր մոտ 55-56 տոկոսի չափ:

Սա նշանակում է, որ վրաց հասարակությունը այսօր բաժանված է՝ Սաակաշվիլու մոլի կողմնակիցների և նրա մոլեռանդ հակառակորդների միջև:
Եվ այսօրվա վրացական ընտրություններում  աշխատում է ոչ այնքան պոզիտիվի գործոնը, այլև այն, թե ով ինչպես է վերաբերվում Սաակաշվիլիին:

Եվ եթե Սաակաշվիլի կողմից որոշում կայացվի երկարաժամկետ բողոքի ցույցեր անցկացնել, ապա այդ երկիրը կարող է հայտնվել լուրջ ճգնաժամի մեջ:
Սակայն, որպեսզի Սաակաշվիլին կարողանա հաջողություն հասնել, ապա նա պետք է ունենա երկարաժամկետ պայքարի քաղաքական, ֆինանսական լուրջ ռեսուրսներ: Բացի այդ, նա պետք է լուրջ աջակցություն ունենա նաև դրսից:
Ինչ վերաբերվում է մեզ, ապա պետք է արձանագրել, որ այս երկու թեկնածուների մեջ հայկական շահերի տեսանկյունից Զուրաբիշվիլին ավելի գերադասելի էր համարվում:
Ավելին, Զուրաբիշվիլիի՝ Ջավախքում արտահայտած թուրքական գործոնի հետ կապված մտքերը խիստ զայրացրել էին ադրբեջանցիներին: Իսկ ադրբեջանաբնակ Մարնեուլիի շրջանում, ընտրությունների առաջին փուլում, Վարշաձեն նույնիսկ ավելի շատ ձայն էր ստացել, քան՝ Զուրաբիշվիլին, ինչը աննախադեպ է Վրաստանի համար, որտեղ սովորաբար ազգային փոքրամասնություները միշտ իշխանամետ դիրքորոշում էին որդեգրում: Սույն փաստը այնքան էր տպավորել Սաակաշվիլիին, որ նա նույնիսկ առաջին փուլի ընտրություններից հետո հատուկ շնորհակալություն էր հայտնել Վրաստանում ապրող ադրբեջանցիներին:

Սակայն, այս ամենը չի նշանակում, որ Վրաստանի արտաքին քաղաքական դոկտրինում լուրջ փոփոխությունների պետք է սպասել:

Արտակ Հակոբյան