Թարմ-թարմ խոստումներ՝ ՀՀԿ-ի կողմից, վերջնաժամկետը՝ դեկտեմբերի 9-ին

Դեկտեմբերի 9-ին կայանալիք ընտրությունների քարոզարշավն արդեն մեկնարկել է: Մասնակից ուժերը մեկը մյուսին հերթ չեն տալիս հասարակությունը նորանոր խոստումներով զարմացնելու համար, թեև մեր հասարակությունը վաղուց արդեն շատ կասկածամտորեն է վերաբերվում նախընտրական խոստումներին:

Աշխատավարձերի ու թոշակների բարձրացումից մինչև ասֆալտ փռել, Արցախյան հարցի լուծումից մինչև միլիարդավոր դոլարների ներդրումներ` նախընտրական խոստումներն ու ծրագրերը երբեմն պարզապես ֆանտաստիկայի ժանր են հիշեցնում` գեղեցիկ, գրավիչ, բաց ոչ` իրական: Երբեմն տպավորություն է, որ ընտրական պրոցեսներին մասնակից քաղաքական հնաբնակ ուժերը օգտագործում են նախընտրական ծրագրի նույն շաբլոնը` ամեն տարի փոքրիկ փոփոխություններով:

Քաղաքական դաշտի հնաբնակ ուժերից մեկը` ՀՀԿ-ն, ի տարբերության անցած տարվա խորհրդարանական ընտրությունների նախընտրական ծրագրին, այս տարի բավական համեստ կերպով է կազմել այն:
2017 թ.ի ընտրություններին ՀՀԿ-ն ամբողջ 44 էջ էր  նվիրել նախընտրական խոստումներին, այս տարի կուսակցությունը բավարարվել է 11 էջանոց ծրագրով: Ինչպես ասվում է` երկրում իրավիճակ է փոխվել:

2017 թվականի ընտրությունների ծրագրում ակնհայտ էր ՀՀԿ-ի` իշխանական վստահությունն ու այդ իշխանությունը պահելու պատրաստակամությունը:
Ծրագրի նախաբանում շեշտում էր` որ դաշտում հունձ անող գյուղացուց մինչև բարձրաստիճան պաշտոնյա պետք է լինի գնահատված և գտնվի պետության ուշադրության կենտրոնում, ընդգծելով, որ ՀՀԿ-ն պատրաստ է աշխատելու յուրաքանչյուրի հետ, ով ցանկանում է քարը քարի վրա դնել:

Այս տարվա նախընտրական ծրագրում արդեն ընդդիմության շարքերից հանդես եկող կուսակցությունը գուժում է` Մեր երկիրն ապրում է իր նորագույն պատմության ամենափոթորկալից և լարված ժամանակահատվածներից մեկը, հավելելով, որ նոր իշխանությունները ոչ միայն չեն լուծում մեր երկրի և մեր ժողովրդի խնդիրները, այլև իրենք են խնդիր դարձել:

Կուսակցության նախորդ և ներկա կարգախոսները ևս վկայում են ռազմավարության էական տարբերությունների մասին, եթե 2017 թ-ին ՀՀԿ-ն խոստանում էր Անվտանգություն և առաջընթաց, ապա այս տարի դիմում է մտահոգ ընտրողներին` եթե մտահոգ ես, ընտրիր հանրապետականին` շտապելով հիշեցնել, որ ՀՀԿ-ն գիտի և ընդունել է իր սխալները:

Հավանաբար ընտրությունների հապճեպ անցկացմամբ պայմանավորված` ՀՀԿ-ն նախորդ 22 առանձին ենթամասերով ծրագրի փոխարեն նախընտրել է ընտրողներին ասել, թե ինչու ընտրել իրենց, որոնք են ՀՀԿ-ի արժեքները, ասել, որ իրենք ազգ-բանակ հայեցակարգի կրողն են, անդրադառնալ Արցախին, արտաքին քաղաքականությանը, 4 փոքրիկ պարբերություն նվիրել տնտեսության զարգացման տեսլականին և ավարտել մարդու մասին ենթաբաժնով, թե հայոց պետության գլխավոր հարստությունն ազգի և պետության հանդեպ պատասխանատվության գիտակցում ունեցող մարդն է:

Այպիսով, ՀՀԿ-ի դիրքերի և մարտավարության փոսփոխությունն ակնհայտ է` նախկին պաթոսին փոխարինելու է եկել ավելի պրագմատիկ գործելակերպ, թե ինչ հաջողություն կունենա դա, կերևա դեկտեմբերի 9-ին:

Ակհայտ է նաև նախընտրական թիմը կազմելու մոտեցումներն ու բծախնդրությունը` նախկին ընտրություններին ՀՀԿ-ն հանդես էր գալիս 197 հոգանոց նախընտրական ցուցակով, այս ընտրություններին նախկին իշխանությունը բավարարվել է 127 հոգանոց կազմով:
Այս ընտրություններին նախկին հնաբնակ հհկ-ականներին փոխարինելու են եկել նոր դեմքերը, որոնց մեծ մասը նույնիսկ անծանոթ են հանրությանը: Հավանաբար նախորդները չկարողացան արդարացնել իրենց, կամ էլ ՀՀԿ-ն իրոք որոշել է գնալ ինքնամաքրման և երիտասարդացման ճամանապարհով, ինչևէ, ինչպես ասում են` կապրենք, կտեսնենք…

Ակաթի Վահանյան