«Դա զզվելի է». Չավուշօղլուն հայտնել է, որ լսել է Ջամալ Խաշոգջիի սպանության ձայնագրությունը

Թուրքիայի արտաքին քաղաքական գերատեսչության ղեկավար Մևլյութ Չավուշօղլուն հայտնել է, որ լսել է ընդդիմադիր սաուդցի լրագրող Ջամալ Խաշոգջիի սպանության ձայնագրությունն ու այն «զզվելի» որակել:

Ինչպես գրում է թուրքական «Հյուրրիյեթ» պարբերականը, թուրք նախարարը նշել է, որ սպանությունն իրագործվել է 7 րոպեում:

«Դա ծրագրված սպանություն էր: Ձայնագրության մեջ լսվում է՝ ինչպես է դատաբժշկական փորձագետը կարգադրում, որ մարմինը մասնատելիս պետք է երաժշտություն լսի: Հասկացվում է, որ նա դա հաճույքով է անում: Նա սիրում է մասնատել մարդկանց: Դա զզվելի է»,-ասել է Չավուշօղլուն:

Թուրքիայի ԱԳ նախարարը նաև հայտնել է, որ թուրքական դատախազությունը ունի Սաուդյան Արաբիային ուղղված շատ հարցեր, որոնք մնում են անպատասխան:

«Որտե՞ղ է մարմինը: Տեղացիներից ո՞վ է օգնել նրանց: Սաուդյան Արաբիան մեզնից տեղեկություն է պահանջում, սակայն իրենք չեն ցանկանում տեղեկություն փոխանցել: Նրանք ցանկացան տեսնել այստեղ իրենց օգնած Թուրքիայի քաղաքացիների ֆոտոռոբոտները, ինչո՞ւ միայն ֆոտոռոբոտները, սաուդցիները նրանց անուններն էլ գիտեն», - նշել է Չավուշօղլուն:

Հիշեցնենք, որ Ջամալ Խաշոգջին անհետացել էր հոկտեմբերի 2-ին: Նրան վերջին անգամ տեսել էին Ստամբուլում Սաուդյան Արաբիայի գլխավոր հյուպատոսություն մտնելիս:

Ավելի ուշ սաուդյան թագավորության իշխանությունները հաստատել էին, որ լրագրողը սպանվել է հյուպատոսության աշխատակցի հետ վիճաբանության ժամանակ, սակայն նրանք հերքել են թագավորական ընտանիքի առնչությունը սպանությանը:

Աղբյուր