Ի՞նչն է ամփոփելու վաղվա ասուլիսում Վանաձորի քաղաքապետը

Վաղը՝ հունվարի 21-ին, մամուլի ասուլիսով հանդես կգա Վանաձորի քաղաքապետ Մամիկոն Ասլանյանը՝ պաշտոնավարման 100-րդ օրվա կապակցությամբ:

Հիշեցնենք, որ Մամիկոն Ասլանյանն այն անձն է, ում ընտրությունը ՏԻՄ ընտրություններից հետո բավական թեժ մթնոլորտում անցավ: 

Իսկ Մամիկոն Ասլանյանի քաղաքապետության այս 100 օրվա ընթացքում «Լուսավոր Հայաստան», «Բարգավաճ Հայաստան» և «Հայկական վերածնունդ» կուսակցությունները ոչ մի անգամ չեն մասնակցել ավագանու որևէ նիստի՝ տապալելով դրանք:

Ավելին, վերը նշված կուսակցություններն օրերս դիմել են ՀՀ վարչապետին՝ Վանաձորի ավագանու լիազորությունները վաղաժամկետ դադարեցնելու առաջարկով: Փաստաթղթում իրավական մասով հիմնավորվել է, որ խախտվում են տեղական ինքնակառավարման վերաբերյալ սահմանադրական նորմերը՝ մասնավորապես Վանաձոր համայնքի տեղական ինքնակառավարման իրավունքն ու հնարավորությունը, ինչպես նաև ավագանու աշնանային նստաշրջանը չկայանալու արդյունքում կառավարությունը «Տեղական ինքնակառավարման մասին» ՀՀ օրենքով սահմանված կարգով լիազորված է վաղաժամկետ դադարեցնելու համայնքի ավագանու լիազորություններն ու միաժամանակ նշանակել նոր ընտրություն:

Ինչ վերաբերում է քաղաքական մասին, ապա, ըստ վերոնշյալ կուսակցությունների ղեկավարության, այստեղ կարևոր է, որ ստեղծված իրավիճակն առաջացել է ոչ թե որևէ ժամանակավոր խնդրի պատճառով, որի չլուծված լինելը խոչընդոտել է նիստերի գումարմանը, այլ այն պայմանավորված է քաղաքական հայացքների և սկզբունքների խորը տարբերությամբ, որն ակնհայտ է, որ չի կարող շտկվել նաև առաջիկա 3 ամիսների ընթացքում։

Ստեղծված իրավիճակում հետաքրքիր է, թե Վանաձորի քաղաքապետն ի՞նչն է ամփոփելու վաղվա ասուլիսում: Անշուշտ, քաղաքապետը կփորձի ներկայացնել 100 օրվա ընթացքում կատարված որոշ կոսմետիկ քայլեր, սակայն բոլորի համար էլ պարզ է, որ առանց ավագանու նիստերի միանձնյա գործողությունները արդեն իսկ տապալման մասին են խոսում: 

Չենք կարծում, որ Մամիկոն Ասլանյանը կխոստովանի իր պարտությունն ու կհանձնվի. հակառակը՝ կփորձի հնարավորինս քաղաքականացնել իրավիճակն ու ստեղծված դրությունը կապել առաջիկա Խորհրդարանական ընտրություններում այդ կուսակցությունների «dividend»-ների հետ:

Անկախ նրանից, թե Վանաձորի գործող քաղաքապետն ի՞նչ կհայտարարի վաղը, որոշիչը Կառավարության պատասխանն է լինելու:

Հասմիկ Գրիգորյան