Ինչու՞ էր սակավամարդ շաբաթօրյա երթը և ի՞նչ ընտրություն կկատարի Նիկոլ Փաշինյանը. Տեսանյութ

Շատերը նկատեցին և արձանագրեցին, որ անցած շաբաթվա Փաշինյանի կողմնակիցների երթը բավականին սակավամարդ էր: Հասկանալի պատճառով ոմանք այս հանգամանքից տխրել էին, մյուսները` ուրախացել:

Փորձենք հասկանալ թե ո՞րն էր երթի սակավամարդության պատճառը, և ինչ՞ հետևություն կանի այդ հանգամանքից Փաշինյանը:

Սիմվոլիկ լեզվով ասած, ապրիլյան թավշյա հեղափոխությանը աջակցում էին՝ և Ալավերդիի պղնձաձուլական կոմբինատի աշխատողները, որոնք մտածում էին, որ իրենց կենսամակարդակը դրա արդյունքում կբարձրանա, և բնապահպահները, որոնք մտածում էին, որ վերջապես այս հեղափոխության արդյունքում այս կոմբինատը կփակվի:
Այս ինտերպոլյացիան կարելի է անել գրեթե բոլոր այլ շերտերի վրա:

Եվ քանի որ Փաշինյանը հեղափոխության ժամանակ կոնկրետ թեզիսներով չէր հանդես գալիս, բոլորին համախմբում էր ընդհանուր կարգախոսը` «Քայլ արա, մերժիր Սերժին», քանզի այս կարգախոսի տակ ամեն մարդ իր ուզածն էր պատկերացնում:

Եվ ահա, երբ Սերժը արդեն 6 ամիս է ինչ հեռացել է, հեղափոխությունից արդեն ամեն մեկն իր ուզածն է պահանջում, և Փաշինյանը այլևս չի կարող խուսափել կոնկրետությունից: Նրա կոնկրետ որոշումից ինչ որ շերտ կշահի, իսկ մյուսը կկորցնի: Դա անխուսափելի է, բայց այստեղ ոչ մի ողբերգություն չկա, քանզի բոլորին բավարարել միանգամից հնարավոր չէ: Այստեղ կարևորը ճիշտ ընտրություն կատարելն է, այն գիտակցումը, որ այդ որոշմամբ է միայն հնարավոր երկիրը դուրս բերել ճգնաժամից: Եվ այդ ճանապարհին դու պետք է հենվես հենց այս սկզբունքների վրա, հենց այս շերտի վրա:

Անշուշտ, նա կարող է կորցնել ընտրազանգվածի մի մասը, սակայն փոխարենը կարող է հենվել առավել առողջ, կենսունակ, մոբիլ շերտի վրա, որի արդյունքում երկիրը կզարգանա ճիշտ ուղիով, իսկ վերջնարդյունքում, ժամանակի ընթացքում հնարավոր կլինի լուծել նաև մյուսների խնդիրները:

Փաշինյանը պետք է հստակ իր ուղենիշի մասին արտահայտվի, քանզի հետագա անորոշությունն իր մեջ լրջագույն վտանգ է պարունակում:

Երկիրը չի կարող զարգանալ առանց հստակ ուղենիշի: Այս հեղհեղուկ, լղոզված վիճակը կարող է հանգեցնել քաոսային գործընթացների, որի սկիզբը կլինի, իսկ վերջը՝ ոչ:
Փաշինյանը այս երթի վերջում հանդես եկավ կարճ ելույթով և դիպուկ բնութագրեց այս երթի խորհուրդը՝ անվանելով այն «քավության երթ՝ իր կողմից թույլ տրված բոլոր սխալների համար»:

Սա ենթադրում է, որ ինքը գիտակցում է, որ հետագա իր գործունեության ընթացքում այլևս չի կարող անորոշ, լղոզված դիքորոշումներով հանդես գալ:

Իսկ թե որը կլինի նրա ընտրությունը, ցույց կտա իր ընտրարշավը¸ իսկ իր ընտրած որոշման վերջնարդյունքի մասին կարող ենք դատել դեկտեմբերի 9–ից հետո:

Արտակ Հակոբյան