Պլան է եղել սեփականաշնորհելու «Կիլիկիա», «Հյուսիսային» և «Սասունցի Դավիթ» ավտոկայանները, ինչը կանխվել է. ՏԿՏՏ նախարարի պաշտոնակատար

«Հայավտոկայան» ՓԲԸ-ն դրվել է մասնավորեցման պլանի մեջ, ինչն անընդունելի սխալ է. այսօր հրավիրված ասուլիսին տեղեկացրեց տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը:

Ըստ նրա՝ դա նշանակում է, որ պլան է եղել սեփականաշնորհելու մասնավորապես «Կիլիկիա» ավտոկայանը, «Հյուսիսային» և «Սասունցի Դավիթ» ավտոկայանները, ինչը կանխվել է: Հակոբ Արշակյանը նշեց, որ ընդունված պրակտիկա է եղել, երբ սնանկացվել է ընկերությունը և սեփականաշնորհել, և այս դեպքը դրանց թվում է:

Նախարարն ասաց, որ այս հարցում իրավական գործընթացներ են սկսվել, և աշխատում են այն ուղղությամբ, որ պետգույքի հաշվեկշռից բերեն պետական հաշվեկշիռ: Այդ գործընթացից հետո Հակոբ Արշակյանը նշեց, որ կփորձեն կենտրոնանալ երթուղային ցանց ստեղծելու վրա, որն ինտեգրված կլինի մայրաքաղաքի կենտրոնացված ցանցին:

«Ձևական կտրոնների ձևը ևս կվերացնենք, և պատշաճ տեխզննություն կանցնեն մեքենաները»,-ասաց նա և նշեց, որ սկզբնական շրջանում ոչ ամբողջական պահանջներով համապատասխան կստիպեն կիրառել: «Բայց ղեկային և արգելակման հետ կապված խնդիրներում կոմպրոմիսներ չեն լինելու»,-ասաց նա:

Ըստ նախարարի պաշտոնակատարի՝ երթուղային ցանցը կա, որակի վերահսկողություն են իրականացնում: «Լինելու են ընկերություններ, որոնք լիցենզիայից զրկվելու են, քանի որ ինչքան էլ նկատողություն է լինում, չեն փոխվում, և նրանք իրենց մաշկի վրա զգալու են»,-ասաց նա:

Աղբյուրը՝ Tert.am