Դեկտեմբերի 9-ին ո՞ր ուժերը կանցնեն խորհրդարան

Քաղաքական դաշտում նախընտրական եռուզեռն արդեն սկսվել է: Չնայած պաշտոնական քարոզարշավը դեռ չի մեկնարկել, բայց քաղաքական ուժերն արդեն սկսել են լրջորեն զբաղվել իրենց դիրքավորմամբ և քարոզչությամբ:
Ինչպես հիշում ենք, արտահերթ խորհրդարանական ընտրություններն ի սկզբանե նախատեսվում էր անցկացնել գարնանը, սակայն իրադարձություններն այլ կերպ զարգացան և արդեն դեկտեմբերի 9-ին Հայաստանի քաղաքացիները կընտրեն օրենսդիր մարմնի ներկայացուցիչներին:
Խորհրդարանում ներկայացված լինելու հայտ են ներկայացրել 11 ուժ` 2 դաշինք և 9 կուսակցություն: Քաղաքագիտական շրջանակներում արդեն ակտիվորեն քննարկվում է, թե որ ուժերը կկարողանան հաղթահարել բաղձալի շեմն ու հայտնվել խորհրդարանում:

Քաղտեխնոլոգ Վիգեն Հակոբյանի դիտարկմամբ՝ հիմնական մրցապայքարը 3-4 ուժի միջև է լինելու:  

«Հետհեղափոխական պրոցեսում տրամաբանական է, որ ով իրականացրել է հեղափոխությունը և կազմակերպել է այս ընտրությունները, վերցնելու է քաղաքական լուրջ մեծամասնությունը: Կարծում եմ` «Իմ Քայլը» դաշինքի դիրքերի մասին ոչ ոք չի կասկածում:
Խորհրդարանում հայտնվելու շանսեր ունի ԲՀԿ-ն: Եվ եթե գրագետ աշխատի և կարողանա ճնշումներին դիմանալ, ապա խորհրդարանում որոշակի տեղ կունենա նաև ՀՀԿ-ն:
«Մենք» դաշինքը ևս բավականին հեռանկարային է, եթե նա կարողանա իրեն հստակ դիրքավորել որպես պրոարևմտյան և լիբերալ արժեքներ կրող կուսակցություն, և եթե կարողանա համոզել Հայաստանի պրոարևմտյան գաղափարախոսությանը կողմնակից ընտրազանգվածին, ապա կարծում եմ` որոշակի շանսեր կան: Այստեղ խնդիրն այն է, որ իրենք դաշինքով են գնում, և անցողիկ տոկոսն ավելի բարձր է»,- Zham.am-ի հետ զրույցում նշեց Հակոբյանը:

Անդրադառնալով ՀՅԴ-ին, քաղտեխնոլոգը նրա շանսերը պրոբլեմատիկ գնահատեց` ընդգծելով, որ կուսակցությունը պետք է լրջորեն զբաղվի իր ռեբրենդինգով:
Հակոբյանը համամիտ չէ այն դիտարկմանը, թե կուսակցությունն արդեն սպառել է իրեն. «Ամեն դեպքում, դա լուրջ կուսակցություն է և համահայկական կառույց: Այն հայաստանյան պրոյեկտ չէ` այն առումով, որ այսօր ստեղծվում է և ակտիվանում է մյուս ընտրությունների ժամանակ: Եթե իրենք համարեն, որ սպառվել են, ապա դա այդպես չեն թողնի, ուղղակի Հայաստանում կփոխեն մարդկանց, կանեն ներքին հեղափոխություն և ռեբրենդինգ: Ամեն դեպքում, այսօր նրանց շանսերը շատ փոքր են»:
Անդրադառնալով նորաստեղծ փոքր կուսակցություններին, մեր զրուցակիցը նշեց, որ այդ ուժերը հավանաբար ակնկալում էին ընտրություններին մասնակցել նոր Ընտրական օրենսգրքով, որտեղ ամրագրված չափանիշներն ավելի բարենպաստ էին:

«Նոր օրենսգրքով նվազեցվում էր անցողիկ շեմը, ինչպես նաև կար չորրորդ պարտադիր կուսակցության թեզը: Նման պայմաններում հնարավոր էր, որ որոշ ուժերի բախտը բերեր և նրանք խորհրդարան անցնեին:
Չմոռանանք նաև, որ եթե կուսակցությունը ստեղծվում է երկարաժամկետ նպատակներով, ապա ընտրություններին մասնակցությունը նրանց համար ներկայանալու փայլուն հնարավորություն է:
Չեմ բացառում նաև, որ կարող են լինել կուսակցություններ, որոնց հիմնական ֆունկցիան իրենց մայր կուսակցություններին աջակցելն է: Նրանք կարող են անել և ասել այն, ինչը չի կարող ասել իրենց ստեղծած մայր կուսակցությունը»,- ընդգծեց քաղտեխնոլոգը:

Ինչ վերաբերում է ընտրակաշառքի և ֆինանսական գործոնին, ապա այս ընտրություններում դրանք մեծ ազդեցություն ունենալ չեն կարող:

«Եթե նախկինում ընտրակաշառքն առաջին գործոնն էր և դրա ազդեցությունը կազմում էր 100 տոկոս, այս դեպքում դրա ազդեցությունը 10-20 տոկոս կլինի: Հիմա ամեն ինչ արվելու է թաքուն, քանի որ, ինչպես բազմիցս հայտարարվել է պետական մակարդակով դրա վրա աչք չի փակվելու: Ամեն դեպքում, որոշակի ազդեցություն կունենա, և դա որոշ չափով կվերածվի ձայների:
Ինչ վերաբերում է ֆինանսական գործոնին, ապա ընտրություններն առանց ֆինանսների չեն լինում, նույնիսկ հեռուտատեսության համար փոքրիկ հոլովակ հեռարձակելու համար մեծ գումարներ են հարկավոր: Հիմա մեզ մոտ կարծես 90-ականների սկզբի պատկերն է, երբ շատ-շատերը առանց ֆինանսական կամ կառուցվածքային պատրաստվածության մտնում են խաղի մեջ ` մտածելով, որ իրենց փայլուն գաղափարները կամ խոսքը ամեն ինչ որոշելու է»,- եզրափակեց Վիգեն Հակոբյանը:

Zham.am