Ճիշտ է Փաշինյանը. Քաղաքական «լոդրերը» պետք է դուրս գան քաղաքականությունից

Փաշինյանի վերջին ելույթը Աստանայում, որտեղ նա խոսում էր այն մասին, որ ճիշտ չէ այն համակարգը, որտեղ 350 000 ակտիվ զանգվածը փաստացի «կերակրում է» 800 000 սոցիալապես «ձրակեր» զանգվածին, մեծ աղմուկ հանեց Հայաստանում: Վարչապետի պաշտոնակատարին մեղադրեցին, որ նա «քցում է» աղքատ զանգվածին, որ նա արտահայտում է հարուստների շահերը և այլն: Արդեն Երևանում, նա սրբագրեց իր խոսքերը, նշելով, որ նա ոչ թե մարդկանց էր մեղադրում, այլ այն համակարգին, որը պարտադրում էր այդ մարդկանց պասիվ սոցիալական կյանքի:

Չեմ ուզում միջամտել այդ վեճին, բայց մի հարցում Փաշինյանը ճիշտ է. անկախ նրանից, թե ով է մեղավոր, բայց պետությունը պիտի խրախուսի մարդկանց դեպի սոցիալապես ակտիվ կյանքի:

Եթե պետությունը հենվի սոցիալապես պասիվ զանգվածի վրա, ապա այդ երկիրը կունենա ԽՍՀՄ-ի ճակատագիրը:

Նույնը վերաբերվում է նաև քաղաքական «լոդրերին»:

Այդպիսին կարելի է համարել նրանց, ովքեր սեփական տեսակետներով հանդես չեն գալիս, այլ փորձում են այս կամ այն «քեռու» տակ մտնելով մնալ քաղաքական դաշտում:

Օրինակ, երբ հարց առաջացավ, թե երբ անցկացնել արտահերթ ընտրությունները, այս տարվա դեկտեմբերին, թե գալիք տարվա գարնանը, տեսակետները բաժանվեցին:

Փաշինյանն ուզում էր, որ այն անցկացվեր դեկտեմբերին և դրա համար մարդկանց հավաքելով ԱԺ-ի մոտ, ստիպեց, որ պատգամավորները «հանձնվեն» և համաձայնվեն իր այդ որոշման հետ: ՀՀԿ-ն դեմ էր դրան, սակայն չկարողացավ դիմադրել, և ստիպված եղավ ընտրություններին մասնակցել Փաշինյանի պայմանով:

ԲՀԿ-ն, Էդմոն Մարուքյանը, Արամ Զավենիչը, «Ազատ դեմոկրատները», « Սասնա Ծռերը» նույնպես ամեն մեկն իր դիրքորոշմամբ պատրաստվում են գալիք ընտրություններին:

Քաղաքական դաշտի մի մասն էլ, ով դժգոհում էր, որ չի հասցնում մասնակցել ընտրություններին, և դեմ էր դեկտեմբերին ընտրությունների անցկացմանը՝ հասկանալի պատճառներով , հրաժարվեց ընտրությունից, ինչը նույնպես հասկանալի էր:

Սակայն քաղաքական ուժերից ոմանք, ամիսներ շարունակ, ակտիվորեն պնդում էին, որ ընտրությունները պետք է անցկացվեն «շուտափույթ» կարգով, դատափետում էին ՀՀԿ-ականներին և ընդհանրապես բոլոր «սևականներին», բայց արի ու տես, որ երբ եկավ ցուցակների կազմման փուլը, նրանք... հայտարարեցին, որ հրաժարվում են մասնակցել գալիք ընտրություններին՝ պատճառաբանելով, որ իբր հին ԸՕ-ը դարձավ իրենց որոշման գլխավոր պատճառը:
 

Հենց այս ուժերը պետք է ընդմիշտ հեռանան երկրի քաղաքական կյանքից, քանզի ցույց տվեցին, որ չունեն ինքնուրույն գործելաոճ և նրանց միակ հույսը ինչ -որ մեկի տակ լինելն է:

Սրանք իրականում մաշվելով «ֆեյք» ուժեր են դարձել, որոնց գլխավոր նպատակը ընտրություններից ընտրություն իրենց փայը փախցնելն է: Կարևոր չէ, թե ումից փախցնել: Նախկինում նրանք Սերժից էին «փայ» պահանջում, այսօր՝ Նիկոլից: Սակայն այսօր, ի պատիվ Նիկոլի, նա հայտարարեց, որ իր կառավարման ընթացքում «կեղծ» ընդդիմության ինստիտուտ չի պահելու, ինչը համաձայնվեք, ողջունելի քայլ է:
Քանզի հույս կա, որ երկրի քաղաքական դաշտը էապես կմաքրվի:

Բացի այդ, Փաշինյանը հայտարարեց, որ փոքր բիզնեսին, / շրջանառությունը մինջև 24 մլն դրամ/ արտոնություն է տալու, նրանք հարկեր չեն մուծելու: Անկասկած սա ճիշտ լուծում է:

Օրինակ անհատ տաքսիստները ազատվում են հարկային պարտավորություններից:
Իսկ ինչու մեր «ֆեյք» գործիչներին չառաջարկել, քաղաքականության տեղը, օրինակ տաքսի քշելով զբաղվել: Նախ դա հանրօգուտ կլինի բոլորի համար, դրանից կշահեն և իրենք, և ուղեվորները, մյուս կողմից, երբ ամեն մեկը իր գործով զբաղվի, վերջնարդյունքում երկիրը կշահի:

Քանզի պորտաբույծների քանակը կքչանա, մուտիլովկաները երկրում կպակասեն, իսկ քաղաքականությամբ էլ կզբաղվեն ավելի ինքնաբավ ուժեր:

Այնպես որ, առնվազն այս հարցում Փաշինյանի մոտեցումները պետք է ողջունել:

Դավիթ Մկրտչյան