Լուկաշենկոն արդեն չի էլ թաքցնում, որ ՀԱՊԿ- ի շուրջ աղմուկը իրականացնում է Ալիևի պատվերով. Տեսանյութ

Օրեր առաջ, երբ Աստանայում այդպես էլ չընտրվեց նոր ՀԱՊԿ-ի քարտուղար, մենք նշել էինք, որ այս ամենի հետևում երևում էր պաշտոնական Բաքվի «ստվերը»: Մենք հեռու ենք տարբեր տիպի կոնսպիրալոգիական տեսություններից, քանզի համարում ենք այդ մտածողությունը կոնտրպրոդուկտիվ: Սակայն ՀԱՊԿ-ի շուրջ իրադարձությունների որոշ փաստեր ուղակիորեն հուշում են, որ ցավոք մենք այս հարցում չենք սխալվում:

Անմիջապես ՀԱՊԿ-ի գագաթնաժողովից հետո Լուկաշենկոն, արդեն Մինսկում, իր մոտ է հրավիրում այդ երկրում Ադրբեջանի դեսպան Լատիֆ Գանդիլովին, և կարծես հաշվետվություն տալիս, թե ինչպես է ինքը, Լուկաշենկոն, չեզոքացրել Փաշինյանի ծրագիրը՝ ՀԱՊԿ-ի քարտուղարի նշանակման հարցում: Ընդ որում, այդ յուօրինակ հաշվետվությունը զուգորդվում էր Ալիևի հասցեին քծնանքով, մասնավորապես նշելով, որ իր և Ալիևի հետ պայմանավորվածությունները իր համար սրբություն են:

Ֆորմալ տեսանկյունից Լուկաշենկոն Ադրբեջանի դեսպանի հանդիպումը պայմանավորել էր  Ալիևի՝ Բելառուս սպասվելիք այցի հետ, որը կայանալու է մեկ շաբաթ անց: Սակայն շատերը նկատեցին, որ այդ հանդիպումը ավելի շատ հաշվետվության էր հիշեցնում՝ ծառայի կողմից տիրոջ ներկայացուցչին: Քանզի ծիծաղելի է, երբ Բելառուսի նախագահը հրապարակավ, մամուլի միջոցի առջև մանրամասն պատմում է ադրբեջանցի դեսպանին, թե ինչ է կատարվել Աստանայում, ՀԱՊԿ-ի գագաթնաժողովում:

Սա ևս մեկ անգամ ցույց է տալիս, որ հայկական կողմը իրավունք չունի վրիպումներ ցույց տալ դիվանագիտական ճակատում:

Ինչո՞ւ մենք պիտի պայմաններ ստեղծեինք, որ նա Ադրբեջանի դեսպանի մոտ ծաղրեր մեր երկրին:

Հավանաբար այս հրապարակային հաշվետվությունը նույնպես ադրբեջանական կողմի պայմաններից մեկն էր, ինչը ցույց է տալիս, որ Բաքուն բոլոր հարցերում բծախնդիր է պատրաստվում և նույնիսկ ՀԱՊԿ-ի հարթակում է կարողանում մեզ դիվանագիտական հարվածներ հասցնել՝ օգտագործելով մեր իսկ սխալները:

Հիշենք, որ այս տարվա ամռանը Փաշինյանը խորհուրդ էր տալիս Լավրովին «ադապտացվել» ներհայաստանյան խնդիրներին:

Հիմա տեսանք, թե ինչպես է Բաքուն Հայաստանին «ադապտացնում»՝ իր խնդիրներին, օգտագործելով մեր իսկ սխալները:

Արտակ Հակոբյան