Թուրքական «Anka» լրատվական գործակալությունը դադարեցրել է գործունեությունը

Թուրքիայում հերթական լրատվամիջոցն է փակվել։ Անկախ լրատվության ոլորտում առաջատարներից մեկը համարվող «Anka» լրատվական գործակալությունը հայտարարել է, որ դադարեցնում է իր գործունեությունը։ Նշվում է, որ լրատվամիջոցի փակման պատճառը ֆինանսական խնդիրներն են։

«Anka»-ն հիմնադրվել էր 1972թ․՝ որպես այլընտրանք պետական «Anadolu» լրատվական գործակալությանը։ Գործակալության հիմնադիր Ալթան Օյմենի խոսքով՝ «Anka»-ին սնանկության հասցրած պատճառների թվում գլխավորը երկրում տիրող քաղաքական մթնոլորտն է։

«Mynet.com» լրատվական գործակալության հավաստմամբ՝ ներկայումս Թուրքիայում ընդդիմադիր դաշտը ներկայացնող կամ անկախ հանդես եկող շատ փոքրաթիվ լրատվամիջոցներ են շարունակում գործել։ Մյուսները կամ անցել են իշխող «Արդարություն և զարգացում» կուսակցության (ԱԶԿ-AKP) ներկայացուցիչների վերահսկողության տակ, կամ ընդհանրապես դադարեցրել են իրենց գործունեությունը։

Աղբյուրը հիշեցնում է, որ «Freedom House» իրավապաշտպան կազմակերպության 2018թ․ զեկույցում Թուրքիան հայտնվել է «անազատ» մամուլ ունեցող երկրների ցանկում։ Իսկ «Լրագրողներ առանց սահմանների» (RSF) ) կազմակերպության կազմած մամուլի ազատության ինդեքսում Թուրքիան 180 երկրների ցանկում 157-րդ տեղն է զբաղեցրել։

Համեմատության համար նշենք, որ ԱԶԿ-ի իշխանության եկած 2002թ․ Թուրքիան ներառվել էր «մասամբ ազատ» մամուլ ունեցող երկրների ցանկում, իսկ մամուլի ազատության ինդեքսում 99-րդ հորիզոնականում էր։

Հիշեցնենք, որ թուրքական մի շարք լրատվամիջոցները միավորող «Doğan Grup» ընկերությունների խումբը 2018թ․ մարտի 21-ին 926 մլն դոլարով վաճառվել էր իշխանությանը մոտ կանգնած «Demirören Holding»-ին։ Դրանով թուրքական լրատվամիջոցների զգալի մասը, փաստորեն, անցել էր իշխանամետ ուժերի անմիջական վերահսկողության ներքո։ «Doğan Grup» -ի մեջ են մտնում «Kanal D», «CNN Türk», «Tv2», «Dream TV», «Dream Türk» հեռուստաընկերությունները, «Hürriyet», «Posta», «Fanatik», «Hürriyet Daily News» պարբերականները և մի շարք այլ լրատվականներ։

Հուլիսի 5-ին իր 10-ամյա գործունեությունը դադարեցրել էր «Habertürk» թերթը։ Իսկ նոյեմբերի 1-ին «Demirören Holding»-ը հայտարարել էր իր գնած «Vatan» թերթի գործունեությունը դադարեցնելու մասին։

Աղբյուր` Ermenihaber.am