Փաշինյանի հիմնական ընդդիմությունը ապագա ԱԺ-ում կլինեն ՀՀԿ-ն և «Սասնա Ծռերը», եթե վերջինս հաղթահարի 5 տոկոսանոց արգելքը. Տեսանյութ

Թեև գալիք ընտրություններում մասնակցելու են տասնյակից ավելի կուսակցություններ ու դաշինքներ, պարզ է, որ պառլամենտ են անցնելու երեք կամ, ծայրահեղ դեպքում, չորս ուժեր:

Որո՞նք կարող են լինել այդ ուժերը

Նախ դա կլինի Փաշինյանի «Իմ քայլը» դաշինքը, որն ամենյան հավանականությամբ  կհավաքի ձայների մոտ 70 տոկոսը: Հասկանալի է, որ այդ թիվը հավաքելու համար անհրաժեշտ կլինի մոբիլիզացնել իր ընտրազանգվածը: Իսկ դրա համար, լավագույն տարբերակը ... վախեցնելն է մարդկանց՝ Մեշոք պապիով, որի դերում կլինի, բնականաբար, ՀՀԿ-ն: Առանց դրա այդ 70 տոկոսը չի հավաքվի:

Երկրորդ ուժը, ով կանցնի պառլամենտ, ՀՀԿ-ն է, քանզի այս ուժը միակն է լինելու, որը քննադատելու է Փաշինյանին: Հասկանալի պատճառով այս ուժի ցուցանիշները կլինի շատ համեստ՝ հաշվի առնելով նրանց անցյալը:

Երրորդ ուժը, որը կանցնի պառլամենտ, ԲՀԿ- է:
Այս ուժին կփրկի միայն իրենց հայտնի լինելը: Իրենց վարկանիշի մարող իներցիան, ամենայն հավանականությամբ, թույլ կտա հայտնվել ապագա պառլամենտում: Թեև ակնհայտ է, որ այս ուժը կորցրել է իր բնական առաքելությունը, և բացառապես իներցիայի հաշվին կհայտնվի ապագա ԱԺ-ում:

Եվ վերջապես, գալիք ընտրությունների գլխավոր ինտրիգը կլինի «Սասնա Ծռերի»՝ ապագա ԱԺ-ում լինել-չլինելու հարցը:

Մնացած ուժերից, «Սասնա Ծռերը», միակն են լինելու, որոնց քննդատությունը Փաշինյանի հասցեին, վստահություն է առաջացնելու հանրության այն հատվածի մոտ, ովքեր, մերժելով ՀՀԿ-ան նախկին իշխանությանը, մերժում են նաև Փաշինյանին, քանզի մեծ տարբերություն չեն տեսնում նրանց միջև: Սակայն ինչքանով նրանք կլինեն կաշկանդված իրենց քննադատության մեջ և կկարողանա՞ն արդյոք մաքսիմալ կոնսոլիդացնել հանրության առավել արմատական զանգվածին իրենց շուրջ, հենց սա է խնդիրը:

Ինչ մնում է մնացած ուժերին, ապա նրանց 5 տոկոսանոց շեմի հաղթահարումը խիստ խնդրահարույց է, մանավանդ ռեյտինգային համակարգով նրանք գրեթե որևէ շանս չունեն` ներկայացված լինելու ապագա ԱԺ-ում:

Արտակ Հակոբյան