Ինչքա՞ն կտևի Փաշինյանի իշխանությունը, մեկ, երկու, թե՝ 10 տարի, կախված է իր քայլերից և մի շարք օբյեկտիվ հանգամանքներից. Տեսանյութ

Հին ԸՕ-ով ընտրությունների գնալը ծանր ազդեցություն է թողել քաղաքական վերնախավի մեծ մասի վրա: Հատկապես շոկի մեջ են արտախորհրդարանական ուժերի ներկայացուցիչները, ովքեր գրեթե համոզված էին, որ ընտրությունները անցկացվելու էին նոր ԸՕ-ով: ՀԱԿ-ն օրինակ, դժվար թե մասնակցի ընտրություններին, քանզի լավ հասկանում է , որ հին ԸՕ-ով գրեթե ոչ մի շանս չունի հայտնվելու ապագա պառլամենտում: Նույն վիճակում է գտնվում «Ժառանգությունը» , որի ներկայացուցիչները արդեն հայտարարում են, որ հավանաբար այս դեկտեմբերյան ընտրություններից հետո կլինի ևս մի նոր արտահերթ ընտրություններ, մոտ 2 տարի անց: Նույնը կրկնում են «Սասնա Ծռերի» ներկայացուցիչները: Եթե հոկտեմբերի 2-ին բոլորը «երդվյալ» հեղափոխականներ էին դարձել, և պահանջում էին «շուտափույտ» ընտրություններ, ապա այսօր նույն մարդիկ արդեն կասկածի տակ են դնում այդ գալիք ընտրությունների լեգիտիմությունը՝ պատրվակ բերելով հին ԸՕ-ի հանգամանքը: Սա ցույց է տալիս, թե ինչքան փխրուն են ամբոխի և պոպուլիստական շահերից ելնելով այդ ամբոխի շահերը սպասարկող այս շրջանակների փոփոխական դիրքորոշումները:

Անկասկած դա շատ լավ է հասկանում նաև Փաշինյանը և դրա համար էլ շտապում է ընտրություններով ամրագրել իր դիրքերը, որպեսզի հետագայում մաքսիմալ անկախ լինի ամբոխից փոփոխական տրամադրվածությունից:

Ինչպես մենք նախկինում նշել էինք ամբոխին օգտագործելն ու հետագայում նրան «քցելը» օրինաչափություն է եղել գրեթե բոլոր հեղափոխություններից հետո: Քանզի առաջնորդի ու ամբոխի փոխհարաբերությունները շատ նման են սիրեկանի ու թեթևաբարո կնոջ փոխհարաբերություններին: Սա մենք չենք ասում, սա , օրինակ, հայտնի փիլիսոփա Էրիխ Ֆրոմն էր ասում: Ռուսները այս երևույթի մասին կարճ են ասում. «Помотросил и бросил»:

Ավելին, ինչպես կյանքում, այնպես էլ քաղաքականությունում, խելացի առաջնորդը չի կարող երկար ժամանակ հենվել ամբոխի վրա, քանզի դրա արդյունքում, կարճ ժամանակահատվածում, կկորցնի պետության կառավարելիությունը և կկորցնի նաև իր իշխանությունը: Երկարաժամկետ կտրվածքով ամբոխի վրա հույս դնելը վտանգավոր է:
Գիտակցո՞ւմ է արդյոք սա Փաշինյանը, մեր կարծիքով՝ այո: Սակայն գիտակցելը քիչ է, անհրաժեշտ է նաև հասկանալ, թե ինչ քայլեր են անհրաժեշտ՝ դուրս գալու համար հեղափոխական օբյեկտիվ փականքներից և ճիշտ լուծումներ գտնել:

Պարզ է մեկ բան, որ Փաշինյանի առջև ընտրության շատ տարբերակներ չկան և՝ որ տարբերակը նա կընտրի, դրանից էլ պարզ կդառնա, թե ինչքան երկարակյաց կլինի իր կառավարման ժամանակահատվածը:

Արտակ Հակոբյան