Ինչու՞ Մարուքյանը որոշեց գալիք ընտրություններին մասնակցել սեփական կուսակցությունով և առանց դաշինքի Արամ Զավենիչի հետ (տեսանյութ)

Ակնհայտ է, որ Մարուքյանի այս որոշման վրա («Լուսավոր Հայաստանը» ընտրություններին կմասնակցի առանձին, ոչ՝ «Լույս» դաշինքով - խմբ.) 
մեծ ազդեցություն թողեց նոր ԸՕ-ի տապալումը:

Նա հասկացավ, որ այս որոշման տակ թաքնված էր նաև Փաշինյանի անուղղակի համաձայնությունը խնդրի այսպիսի լուծման հետ: Հակառակ դեպքում Փաշինյանը հեշտությամբ կարող էր անցկացնել նոր ԸՕ-ը, բայց կանխամտածված չգնաց այդ քայլին:
Պարզ է, որ այս դեպքում Մարուքյանը պետք է կարողանա հաղթահարել 5 տոկոսանոց շեմը, իսկ 7 տոկոսի հաղթահարումը, իսկ այդպիսին է լինելու հին ԸՕ-ի պարագայում, կլինի գրեթե անհնարին:

Մյուս կողմից, Մարուքյանը իր այս որոշումով, գրեթե բացահայտում է իր վախերը, և ուրեմն Արամ Զավենիչի այն թեզը, թե «Լույս» դաշինքը կլինի ընտրություններում երկրորդը, արդեն համոզիչ չէր թվում:

Արամ Զավենիչը, բնականաբար, չէր կարող համաձայնվել Մարուքյանի այս որոշման հետ, քանզի դրանով համոզիչ չէր լինի իր վերը նշած թեզը: Հենց դրա պատճառով էլ նա հաստատ չի լինի Մարուքյանի ցուցակում: Մյուս կողմից, Մարուքյանն ավելի իրատեսական է, քանզի շատ լավ հասկանում է, որ գալիք ընտրություններում 7 տոկոսի համար պայքարելը իրատեսական չի կարող լինել:

Այսպիսով, կարող ենք արձանագրել, որ գալիք ընտրություններով նախկին «ԵԼՔ» դաշինքը վերջնականապես կփլուզվի, իսկ նման պարագաներում, սովորաբար փլուզված բեկորները առանձին-առանձին հաջողություն չեն գրանցում:

Սա այն դեպքն է, երբ ճիշտ են և Մարուքյանը, ով չի հավատում 7 տոկոս հավաքելու գաղափարհին, և Արամ Զավենիչը, ով նշում է, որ այս քայլով հանրությունը մեսիջ է ստանում, որ «ԵԼՔ»-ի նախկին դաշնակիցները անվստահ են իրենց զգում:

Իսկ սա նշանակում է, որ «նոր» Հայաստանում նախկին «ԵԼՔ»-ի գործընկերները ամենայն հավանականությամբ տեղ չեն ունենա:

Արտակ Հակոբյան