Արամ Սարգսյանը մերժել է «Լուսավոր Հայաստանի» ցուցակով մասնակցելու առաջարկը․ Ինչո՞ւ պառակտվեց «Լույս» դաշինքը

«Հանրապետություն» կուսակցության ղեկավար Արամ Սարգսյանը չի համաձայնել արտահերթ խորհրդարանական ընտրություններին մասնակցել «Լուսավոր Հայաստան» կուսակցության ցուցակով։ Այս մասին NEWS.am-ի հետ զրույցում ասաց «Հանրապետություն» կուսակցության անդամ Անի Խաչատրյանը։

«Առաջարկը, որ Արամ Սարգսյանը մասնակցի «Լուսավոր Հայաստան» կուսակցության ցուցակով չընդունվեց: Մենք մեր մասնակցության ձեւաչափը եթե ոչ այսօր, ապա վաղը կհայտարարենք։ Մեր քննարկումներ դաշինքով, թե կուսակցությամբ մասնակցելու շուրջ էր, եւ մենք համոզված ենք, որ 7 տոկոսը «Լույս» դաշինքի համար շատ փոքր տոկոս է, մենք 7-ից շատ ավելի տոկոսներ կարող ենք հավաքել»,-ասաց Անի Խաչատրյանը՝ նշելով, որ չի բացառում, որ արտահերթին կմասնակցեն այլ դաշինքով։

Անի Խաչատրյանը նշեց, որ իրենք դեռ ցուցակ չեն կազմել, սակայն հստակ է, որ ցուցակում լինելու են Արամ Սարգսյանը եւ Արտակ Զեյնալյանը։

«Լուսավոր Հայաստան» կուսակցության անդամ Դավիթ Խաժակյանն էլ ասաց, որ իրենց ցուցակը նույնպես դեռ պատրաստ չէ, սակայն ցուցակում կլինեն Էդմոն Մարուքյանը, Մանե Թանդիլյանը, Գեւորգ Գորգիսյանը, Անի Սամսոնյանը, Հարություն Բաբայանը եւ կուսակցության խորհրդի այլ անդամներ։

«Մոտ օրերս ցուցակը կհստակեցնենք եւ կհրապարակենք, թե ովքեր են լինելու մեր ցուցակում։ Մենք մասնակցության տարբեր ձեւաչափեր ենք քննարկել եւ եկանք այն եզրահանագման, որ պետք է առանձին մասնակցենք, սակայն մեր գործունեությունը ավագանիում շարունակվելու է «Լույս» դաշինքի շրջանակում»,- ասաց Դավիթ Խաժակյանը։

Նշենք, որ արտահերթ խորհրդարանական ընտրությունները տեղի կունենան 2018թ-ի դեկտեմբերի 9-ին, նախընտրական քարոզարշավը կմեկնարկի նոյեմբերի 26-ից։ Կուսակցություններն ու կուսակցությունների դաշինքները կարող են իրենց հայտերը ներկայացնել մինչև նոյեմբերի 14-ը, ժամը 18։00-ն։ Նրանց ԿԸՀ-ն կգրանցի մինչև նոյեմբերի 19-ը, ժամը 18։00-ն։ Քարոզչության ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ: