Ի՞նչ թիմով է պատրաստվում հանդես գալ Փաշինյանը գալիք ընտրություններին. Տեսանյութ

Դատելով այն հանգամանքից, որ տարբեր ուժերից մարդիկ են դուրս գալիս և իրենց հավատարմությունն են ցույց տալիս Փաշինյանի թիմին, պարզ է դառնում, որ այս ամենը պատահականություններ չեն: Այն հավանաբար ուղորդվում է մեկ հայտնի կենտրոնից և դա նշանակում է, որ վաղվա «Իմ քայլը» դաշինքը կազմված է լինելու հենց այդ մարդկանցից նաև:

Իսկ սկզբունքը հավանաբար լինելու է հետևյալը, դաշինքի կազմում լինելու են մեկ եզդի, մեկ  քուրդ, մեկ ասորի, հետո ջավախքցի, ապարանցի, հետո նախկին ՀՀԿ-ական, նախկին ԲՀԿ-ական, նախկին ժառանգական, լուսավոր, նախկին ՀԱԿ-ի անդամ և այլն:

Սա նշանակում է, որ Փաշինյանը արդեն չի էլ թաքցնում, որ վերը նշված ուժերին նա համարում է բալաստ:
Իհարկե, երկրի պառլամենտում ֆորմալ պիտի լինի նաև ընդիմություն, և այդ դերում , հավանաբար լինելու են ՀՀԿ-ն ու ԲՀԿ-ն:

Սակայն երկրի գլխավոր ուժը պիտի լինի ՔՊ-ն, ինչպես որ նախկինում ՀՀՇ-ն ու ՀՀԿ-ն էին:

Այս սուպերկուսակցության մոդելի մասին Փաշինյանը մտածում էր դեռ այն ժամանակ, երբ ընդիմություն էր: Հենց այդ ժամանակ էլ նա նշում էր, որ չի հավատում դաշինքների կայունությանը և կողմնակից է մեծ միասնական ընդիմադիր ուժի ձևավորմանը: Այսօր առավել ևս նա փորձելու է իրագործել իր այս պատկերացումները քաղաքական դաշտում:

Մյուս կողմից, լինելով իշխանություն, Փաշինյանը փորձելու է մաքսիմալ ներառական տեսք տալ իր դաշինքին: Իսկ որպեսզի 70 - 80 տոկոս ձայն ստանալու հարցը լուծվի, նա պիտի մոբիլիզացնի մարդկանց՝ կիրառելով իր հայտնի սև-սպիտակային թեզիսը:

Սակայն իրականում իր այս ցուցակը ոչինչ չի ասելու, թե ովքեր են իրականում ձևավորելու իր իշխանության կորիզը: Այս հարցում նա կուզենա միանձնյա որոշումներ կայացնելու հնարավորություն ունենալ:

Այսպիսով, ՀՀՇ-ից ու ՀՀԿ-ից հետո Փաշինյանը ուզում է ձևավորել իր սուպերկուսակցությունը: Իսկ թե ինչ գաղափարական և պրակտիկ կիրառական կոնցեպտ է ունենալու այդ ուժը հայտնի չէ: Ընդ որում, դա հայտնի չէ նույնիսկ իր՝ Փաշինյանի համար:

Դրանով էլ նա անկանխատեսելի է դարձնում իրեն և իր թիմին ոչ միայն ներսի, այլև դրսի շրջանակների համար:

Արտակ Հակոբյան