Պակիստանում դատարանն արդարացրել է Մուհամեդ մարգարեին «վիրավորելու» համար մահապատժի դատապարտված քրիստոնյա կնոջը

Պակիստանի գերագույն դատարանը չեղարկել է Մուհամեդ մարգարեին «վիրավորելու» համար 2010թ. մահապատժի դատապարտված քրիստոնյա կնոջ՝ Ասիա Բիբիի վճիռը:

Այս մասին գրել է Tert.am -ը՝ հղում անելով The Guardian- ին, տվյալ որոշումը շրջադարձային է երկրի արդարադատության համակարգի համար: Պարբերականը գովելի է համարում այն փաստը, որ Գերագույն դատարանն իսլամիստական խմբերից ստացած սպառնալիքների ու զանգվածային բողոքի ֆոնին քաջություն է ունեցել չեղարկել վճիռը:

Հայտնի է, որ իսլամիստները սպառնացել են սպանել դատավորներին, եթե նրանք արդարացնեն մարգարեին «վիրավորած» քրիստոնյային: Ուստի՝ վճռի հրապարակման օրը մայրաքաղաք Իսլամաբադում 300-ից ավելի ոստիկան է տեղակայվել դատավորների անվտանգությունն ապահովելու համար:

«Ուշագրավ է, որ մեղադրյալի անունը՝ Ասիա, արաբերենով նշանակում է «մեղանչած»: Սակայն տվյալ գործի շրջանակում նա ներկայանում է որպես մարդ, որը Շեքսպիրի Լիր արքայի խոսքերով՝ այնքան մեղավոր չէ ուրիշների առաջ, որքան ուրիշներն են մեղանչել նրա դեմ»,- գերագույն վճռում կարդացել է դատավորը:

Աղբյուրը մանրամասնում է, որ 47-ամյա Բիբին, որը չորս երեխա ունի ու աշխատում էր ֆերմայում, սրբապղծության մեղադրանքով 2010թ. դատապարտվել էր կախաղան բարձրացվելու միջոցով մահապատժի:

Հայտնի է, որ կինը ֆերմայում աշխատելու ժամանակ ջուր էր խմել մուսուլման կանանց բաժակով, ինչով էլ զայրացրել էր նրանց: Նրանք ասել էին, որ քրիստոնյան չի կարող օգտագործել մուսուլմանների սպասքն ու պահանջել էին, որ Բիբին կրոնափոխ լինի: Երբ Բիբին հրաժարվել էր, ֆերմայի աշխատակիցները նրան մեղադրել էին Մուհամեդ մարգարեին վիրավորելու համար: Մասնավորապես՝ Բիբին ասել էր, որ հավատում է Հիսուս Քրիստոսին, որը մահացել է խաչի վրա՝ մարդկության մեղքերի համար, «իսկ ի՞նչ է արել ձեր մարգարեն մարդկությանը փրկելու համար»: