Սինագոգում 11 մարդու սպանած Բոուերզին մեղադրանք են ներկայացրել

Ամերիկյան Փենսիլվանիա նահանգի Պիթսբուրգ քաղաքի սինագոգում 11 մարդու գնդակահարած Ռոբերտ Բոուերզին երեկ հաշմանդամի սայլակով առաջին անգամ բերել են դաշնային դատարան, որտեղ նրան մեղադրանք են առաջադրել:

Բոուերզը դատարանի որոշմամբ կմնա բանտում՝ առանց գրավի դիմած ազատ արձակվելու իրավունքի:

Հիշեցնենք, որ նքնաձիգ հրացանով և երեք ատրճանակով զինված 46 -ամյա Բոուերզը հոկտեմբերի 27-ին ներխուժել է «Կենաց ծառ» սինագոգ և կրակել է մարդկանց ուղղությամբ:

Ոստիկանության հետ փոխհրաձգության ընթացքում նա վիրավորվել է և հանձնվել: 

«Ես պարզապես ուզում եմ սպանել հրեաներին», - փոխհրաձգությունից հետո ասել է Բոուերզը ոստիկաններին:

Դատական հաջորդ նիստը նախատեսված է նոյեմբերի 1-ին:

ԱՄՆ նախագահ Դոնալդ Թրամփը մտադիր է այսօր մեկնել Փիթսբուրգ և Ամերիկայի ժողովրդի անունից իր համերաշխությունը հայտնել հրեական համայնքին:

Փիթսբուրգի հրեական ազատական շրջանակների անունից սակայն հրապարակվել է բաց նամակ, որում ասվում է, որ «Թրամփի այցը չեն ողջունի, քանի դեռ նա առանց վերապահումների չի դատապարտում սպիտակամորթների ազգայնականությունը»:

Zham.am