Էրդողանի խորհրդականը քրդական դիրքերի գնդակոծումը համարել է «բարեկամական ուղերձ»` ԱՄՆ-ին
Թուրքիայի նախագահ Ռեջեփ Թայիփ Էրդողանի խորհրդականներից Իլնուր Չևիկը մեկնաբանել է սիրիական Մանբիջում թուրքական ԶՈւ-ի կողմից քրդական դիրքերի գնդակոծությունները:
Թուրքական լրատվամիջոցների հաղորդմամբ, Էրդողանի խորհրդականը նշել է, որ քրդական դիրքերի գնդակոծմամբ Թուրքիան «բարեկամական ուղերձ» է հղել ԱՄՆ-ին, որը ոչ միայն չի ապահովում քուրդ զինյալների դուրսբերումը Մանբիջից, այլև շարունակում է աջակցել քրդական ջոկատներին:
«Սա զգուշացում է: «Բարեկամական ուղերձ» ԱՄՆ-ին, որը շարունակում է չստիպել տարածքում իրենց ոտքը պնդացրած քուրդ զինյալներին հեռանալ այստեղից: Նրանք այստեղ գործողություններ են իրականացնում, որոնք ուղղված են Սիրիայի տարածքային ամբողջականության դեմ, և ԱՄՆ-ն աչք է փակում այդ ամենի վրա: Սա դուր չի գալիս անգամ Ռուսաստանին ու Իրանին: Թուրքիան այս ուղերձները հղել է նաև Աֆրինում ու արել այն, ինչ պետք էր: Հիմա հերթը Մանբիջինն ու Եփրատի արևելյան ափինն է», - ասել է Էրդողանի խորհրդական Իլնուր Չևիկը :
Հիշեցնենք, որ ավելի վաղ սիրիական Մանբիջում համատեղ գործողությունների ծրագրի շուրջ աշխատող թուրք-ամերիկյան աշխատանքային խումբը վերջնական համաձայնության էր եկել «ճանապարհային քարտեզի» վերաբերյալ ու համաձայնել համապատասխան փաստաթուղթն ուղղել երկու երկրների պետական բարձր մարմիններին։
Zham.am
Հետևեք մեզ Facebook-ում