ՀՖՖ-ն կեղծ փաստաթղթեր է հայտնաբերել և դիմում է ոստիկանությանը

2018 թվականի հոկտեմբերի 25-ին կայացած ՀՖՖ կարգապահական կոմիտեի հերթական նիստում քննարկվել է ընթացիկ մրցաշրջանում մինչև 14 տարեկանների մանկապատանեկան առաջնության Բ1 ենթախմբում հանդես եկող «Անդրանիկ-05» և մինչև 16 տարեկանների մանկապատանեկան առաջնության Ա ենթախմբում հանդես եկող «Արտաշատ-03» թիմերում ընդգրկված մի քանի ֆուտբոլիստների փաստաթղթերի համապատասխանության հարցը:

Այս մասին հայտնում է ՀՖՖ-ի պաշտոնական կայքը:

ՀՖՖ–ի կողմից կատարված ուսումնասիրությունների արդյունքում պարզվել է հետևյալը`

2018-19 թթ. մրցաշրջանի մեկնարկից առաջ ՀՀ Արարատի մարզի «Արտաշատի մանկապատանեկան համալիր մարզադպրոց» ՀՈԱԿ-ի «Արտաշատ-03» թիմում (պատասխանատու մարզիչ՝ Թելման Յաղմուրյան) հանդես գալու համար նույն մարզի Լուսառատի միջնակարգ դպրոցի կողմից 3 պատանի ֆուտբոլիստների (Մուշեղ Ղազարյանին, Սուրեն Մոսոյանին և Նարեկ Էմիշյանին) տրվել է կեղծ փաստաթղթեր (կեղծված են ծննդյան տարեթվերը):

2018-19 թթ. մրցաշրջանի մեկնարկից առաջ ՀՀ Գեղարքունիքի մարզի Վարդենիսի թ. 1 մարզադպրոցի «Անդրանիկ-05» թիմում (պատասխանատու մարզիչ՝ Սամվել Ասատրյան) հանդես գալու համար նույն մարզի Խաչաղբյուր ու Լուսակունք գյուղերի միջնակարգ դպրոցների կողմից տրամադրված պատանի ֆուտբոլիստների (Արգիշտի Սողոմոնյան, Էդգար Գրիգորյան և Նարեկ Մարգարյան) ծննդյան վկայականներն իրականում պատկանում են այլ երեխաների:

ՀՖՖ կարգապահական կոմիտեն խստորեն պատժել է կեղծ փաստաթղթերով մանկապատանեկան առաջնություններում հանդես եկող թիմերին, համապատասխան պաշտոնյաններին:

Մասնավորապես, «Արտաշատ-03» թիմին գրանցվել են տեխնիկական պարտություններ բոլոր այն խաղերում, որոնց մասնակցել են վերաոնշյալ ֆուտբոլիստները, պատասխանատու մարզիչ Թելման Յաղմուրյանը որակազրկվել է 3 տարի ժամկետով:

«Արտաշատի համալիր մարզադպրոց» ակումբը տուգանվել է 150 000 դրամով:

Որոշվել է նաև «Արտաշատի համալիր մարզադպրոց» ակումբի «Արտաշատ-03» թիմին, ՀՖՖ-ի կարգապահական կանոնակարգի 18-րդ հոդվածի 14-րդ կետի համաձայն, հանել Մ16Ա առաջնությունից, իսկ «Արտաշատի համալիր մարզադպրոց» ակումբը տուգանել 50000 դրամով:

Վարդենիսի թ. 1 մարզադպրոցի «Անդրանիկ-05» թիմին ևս գրանցվել են տեխնիկական պարտություններ բոլոր այն խաղերում, որոնց մասնակցել են վերոնշյալ ֆուտբոլիստները: «Անդրանիկ-05» թիմի պատասխանատու մարզիչ Սամվել Ասատրյանը որակազրկվել է 3 տարի ժամկետով: «Վարդենիսի թ.1 մարզադպրոց» ակումբը տուգանվել է 150000 դրամով:

ՀՖՖ-ի այս հայտարարությունը համարվում է հիմք ՀՀ ոստիկանությանը՝ ներկայացված գործերին համապատասխան ընթացք տալու համար: