Հույս ունենք, որ Հայաստանը կլինի կայուն պետություն. Զատուլին. Տեսանյութ

ՌԴ Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի առաջին փոխնախագահ Կոնստանտին Զատուլինը լրագրողների հետ զրույցում կարծիք է հայտնել և ասել է, որ Ռուսաստանը ուշադրությամբ հետևում է Հայաստանում տեղի ունեցող իրադարձություններին և տրամադրված է հայ-ռուսական հարաբերությունների զարգացմանը՝ անկախ նրանից, թե ով կլինի իշխանություն:

«Հույս ունեմ, որ նույն տրամադրվածությունը ունի նաև Հայաստանը և երկրի քաղաքացիները: Մենք տեղյակ ենք, թե ինչ է կատարվում Հայաստանի ներքաղաքական կյանքում և հույս ունենք, որ Հայաստանը կլինի կայուն պետություն, որ մեր դաշնակիցը կհաղթահարի բոլոր հնարավոր ներքին մարտահրավերները, կշարունակի տնտեսության զարգացումը: Մենք աջակցում ենք Հայաստան ներդրումներ ներգրավելու բոլոր մտադրություններին: Ռուսաստանը, անկասկած, այս հարցում որոշակի գործառույթ ունի, քանի որ վերջին տարիների ընթացքում հանդիսանում է ամենախոշոր ներդրողը: Ես կարծում եմ նաև, որ կարևոր է երկու երկրների քաղաքացիական հասարակությունների միջև երկխոսությունը, որովհետև երկրների միջև շփումները չեն կարող լինել միայն միջկառավարական մակարդակով: Դա ճիշտ չի լինի»,- ասել է Կոնստանտին Զատուլինը:

ԱՊՀ երկրների ինստիտուտի ղեկավարն անդրադարձել է նաև ԱՄՆ նախագահի խորհրդական Ջոն Բոլթոնի Հայաստան այցին, ինչպես նաև ղարաբաղյան հակամարտության խնդրին՝ ասելով. «Վաշինգտոնը կարծում է, որ ՀՀ վարչապետ Նիկոլ Փաշինյանի ռեյտինգը թույլ կտա նրան որոշումներ կայացնել առանց Ղարաբաղի ժողովրդի կարծիքը հաշվի առնելու»: 

Նա պատասխանել է հայ - ռուսական հարաբերություններին, ներկա իշխանությունների՝ նախկին քաղաքական գործիչների հանդեպ ցուցաբերած վերաբերմունքին առնչվող մի շարք հարցերի:

Zham.am