Նիկոլ Փաշինյանը Մոսկվայի ու «Սասնա Ծռերի» արանքում

Շատերը զարմացած են, թե ինչ սառնասրտությամբ և հանդուրժողականությամբ է մեկնաբանում Փաշինյանը ՀՀԿ-ի կողմից նոր ԸՕ-ի բոյկոտի հարցը: Արտախորհրդարանական ուժերը, ՀԱԿ-ը, Ժառանգությունը և մյուսները զարմացած են, թե ինչու Փաշինյանը գործուն ջանքեր չի ձեռնարկում, որպեսզի ԱԺ-ին ընդունել տա նոր ԸՕ-ն: Օրինակ, դեկտեմբերին անցկացվելիք ընտրությունների հարցը Փաշինյանը լուծեց ամբոխի միջոցով, իսկ ավելի հեշտ խնդիրը, ըստ նրանց, նա չի ուզում լուծել, ինչու՞` հռետորական հարցադրումով են հանդես գալիս արտախորհրդականները, և այդպես էլ չեն հասկանում դրա պատճառը:

Մինչդեռ Փաշինյանը և իր թիմը անկեղծորեն նշում են, թե իրենց միևնույն է , թե որ օրենսգրքով կգնան ընտրությունների:

Թվում էր, թե Փաշինյանին, գոնե իմիջային առումով, անհրաժեշտ էր, որպեսզի նա ընտրությունների գնար նոր ԸՕ-ով, սակայն նա հետևողականորեն այս հարցում շատ պասիվ է իրեն պահում:

Նման պահվածքը հասկանալի բացատրություն ունի:

Նախ, Փաշինյանին շահավետ է, որ ապագա ԱԺ-ում միայն Փաշինյանի թիմը ներկայացնի «Նոր Հայաստանը», իսկ դրա հավանականությունը մեծ է, եթե ընտրությունները անցկացվեն հին օրենսգրքով: Այդ դեպքում ապագա ԱԺ-ում կհայտնվի երեք ուժ՝ «Իմ քայլը»  դաշինքը, ԲՀԿ-ն և ՀՀԿ-ն: Մնացած ուժերը չեն կարողանա հաղթահարել ռեյտինգային համակարգի բնական խոչնդոտները:

Եվ ճիշտ հակառակը, եթե ընտրությունները անցկացվեն նոր օրենսգրքով, ապա կասկածի տակ կլինի ՀՀԿ-ի և ԲՀԿ-ի մուտքը ապագա ԱԺ-ում: Իսկ այս պարագայում, մեծ կլինի, օրինակ, «Սասնա Ծռերի» հավանական հայտնվելը ԱԺ-ում: Ավելին, այս պարագայում  ԱԺ մտնելու համար տեսական շանսեր կունենան թե՛ ՀԱԿ-ը, և թե՛ «Ժառանգությունը», էլ չենք խոսում «Լույսի» մասին:

Ահա թե ինչու են նրանք շահագրգռված, որ նոր ԸՕ-ը ընդունվի:

Բացի այդ, Փաշինյանը ունի ևս մի պատճառ` գնալ ընտրությունների հին օրենսգրքով:

Բանն այն է, որ Մոսկվան հավանաբար ներքին կապերով զգուշացրել է Փաշինյանին, որ չի ուզում ապագա ԱԺ-ում տեսնել «Սասնա Ծռերին» , իր ընդգծված հակառուսական կեցվածքի պատճառով: Իսկ նոր գլխացավանք Մոսկվայի հետ հարաբերություններում, Փաշինյանին հաստատ պետք չէ: Ահա թե ինչու նոր օրենսգրքի ընդունման հարցում, Փաշինյանի ու ՀՀԿ-ականների միջև կա լռելյայն համաձայնություն, և ամենայն հավանականությամբ գալիք երկուշաբթի նոր ԸՕ-ի ընդունումը կրկին կտապալվի, իսկ դրա մեղքը կգցվի ՀՀԿ-ի վրա: Իսկ վերջիններս համաձայնվել են այս հարցում «քավության նոխազի» դերը ստանձնել:

Արտակ Հակոբյան