Մեր վարչապետին սխալ ինֆորմացիա են տալիս. Կապանի նորընտիր քաղաքապետը՝ Փաշինյանի արած հայտարարության մասին (տեսանյութ)

Կապանի նորընտիր քաղաքապետ Գևորգ Փարսյանը հերքում է այն տեղեկությունը, թե իր հաղթանակի գործում մեծ է եղել նախկին իշխանությունների գործոնը: SHANTNEWS.am-ի հետ զրույցում Փարսյանը հայտնել է, որ Նիկոլ Փաշինյանին իր վերաբերյալ սխալ տեղեկություններ են հայտնել:

Հիշեցնենք, երեկ ՀՀ ԱԺ-ում տեղի ունեցող արտահերթ նիստի ժամանակ վարչապետի պաշտոնակատար Նիկոլ Փաշինյանը հայտարարել է, որ հոկտեմբերի 21-ին Կապանում տեղի ունեցած քաղաքապետի ընտրությունում օգտագործվել է նախկին իշխանությանը հատուկ քրեական ուժերի հնարավորությունը:

Ըստ Փաշինյանի՝ քրեաօլիգարխիկ ուժերը հանրությանն ուղղորդել են ընտրության ժամանակ, որի արդյունքում հաղթել է ոչ թե իրենց ներկայացրած թեկնածուն, այլ ուրիշ անձ:

Նորընտիր քաղաքապետը SHANTNEWS.am-ի հետ զրույցում չի թաքցրել՝ ջերմ հարաբերություններ ունի Կապանի, այսպես ասած, վերնախավի հետ, այդ թվում նաև ՀՀԿ-ականների, բայց այդ կապերն ընտրություններում չի օգտագործել:

«Չեմ հասկանում վարչապետի ասածի պատճառը: Իմ մոտ այնպիսի տպավորություն է՝ մեր վարչապետին սխալ ինֆորմացիա են տալիս: Կապանում չկա քրեական էլիտա»,-ասաց Փարսյանը:

Դիտարկմանը, թե վարչապետը նկատի ուներ նախկին իշխանություններին, Փարսյանն այսպես արձագանքեց.

«Նախկին իշխանության անդամնե՞ր: Չեմ պատկերացնում՝ ում մասին է խոսքը»:

Նշենք, որ Կապանի նորընտիր քաղաքապետն անկուսակցական է, նա հաղթել էր «Քաղաքացիական պայմանագիր» կուսակցության թեկնածու Նարեկ Բաբայանին:

">