Փաշինյանի կոչին կարձագանքե՞ն համայնքապետերը

ՀՀ վարչապետի պաշտոնակատար Նիկոլ Փաշինյանը նախօրեին ԱԺ-ում կոչ արեց, որ բոլոր համայնքապետերը վայր դնեն իրենց լիազորությունները և մասնակցեն համայնքի ղեկավարի արտահերթ ընտրություններին։

Politica.am-ը փորձեց պարզել, թե որքանո՞վ է այդ կոչն ընդունելի համայնքի ղեկավարների համար և սկսեցինք Լուռու մարզի Ջրաշեն համայնքից:

1999-ից մինչև օրս գյուղապետ աշխատող Վահան Ուռուսյանից հետաքրքրվեցինք՝ պատրաստվո՞ւմ է հետևել Նիկոլ Փաշինյանի կոչին և վայր դնել իր լիազորությունները։

-Դա մեզ չի վերաբերվում, մենք ընտրված մարմին ենք։ Բայց ինչի՞ վայր դնենք, եթե ընտրված մարմին ենք,- ասաց նա։

Մեր ճշտող հարցին՝ չի պատրաստվում հրաժարական տալ, քանի որ իր եղբայր Փայլակ Ուռուսյանը համարվում է Ազգային անվտանգության ծառայության աշխատակից, և այդպիսով ինքը, փաստորեն, ապահովագրվա՞ծ է արտահերթ ընտրություններից, Ջրաշենի ղեկավարը նշեց․

-Փայլակ Ուռուսյանը արդեն 10 տարի է, որ Ազգային անվտանգության ծառայության աշխատակից չէ: Մի երկու տարի աշխատել է ԱԱԾ-ում, առաջին տեղակալի օգնականն էր: Այժմ նա թոշակի է:

Համայնքի ղեկավարը նաև նշեց, որ եթե ժողովրդի և Նիկոլ Փաշինյանի կոնկրետ պահանջը լինի, ինքը հրաժարական կտա․

-Ես միշտ էլ ընդդիմություն եմ եղել, ներկա պահին՝ Փաշինյանի հետ եմ։

Նշենք, որ Ջրաշեն համայնքի ղեկավարի հերթական ընտրությունները տեղի են ունենալու 2021 թվականին։