Էրդողանը` «Թուրք եմ, ազնիվ եմ, աշխատասեր եմ» երդման վերականգնման դեմ

Թուրքիայի նախագահ Ռեջեփ Թայիփ Էրդողանը քննադատել է երկրի դպրոցներում աշակերտական երդման վերականգնումը՝ նշելով, որ Թուրքիայի Հանրապետության բարձրագույն վարչական դատարանն, այսպիսով, սխալ քայլ է թույլ տվել:

Նշենք, որ «Թուրք եմ, ազնիվ եմ, աշխատասեր եմ» աշակերտական երդումը, որ տասնյակ տարիներ պարտադրվել է Թուրքիայի բոլոր դպրոցներին ու չեղարկվել միայն 2013-ին, պարտադրվում է նաև Ստամբուլի հայկական համայնքի բոլոր դպրոցներին:

Ինչպես գրում է թուրքական «Հյուրրիյեթ» պարբերականը, Էրդողանը հատկապես բարկացել է, որ իրենց կողմից դեռևս 2013 թվականին չեղարկված օրենքին դատարանն արձագանքում է միայն 5 տարի անց:

«2013-ին ո՞ւր էիք: 2013-ից մինչև 2018 թվական ո՞ւր էիք: Ինչո՞ւ մինչ այսօր սրա հետ կապված որևէ որոշում չի տրվել և միայն հիմա է տրվում: Հիմա՞ հիշեցիք: Կներեք, բայց երբ սխալ եք անում, ստիպված ենք ասել այդ մասին: Հետո երբ ժողովուրդը մեզ է քարկոծում, պատասխանը մենք ենք տալիս», - ասել է Էրդողանը:

Ավելի վաղ Թուրքիայի նախկին վարչապետ ու արտգործնախարար Ահմեդ Դավութօղլուն նույնպես քննադատել էր այս որոշումը:

Twitter-ի իր պաշտոնական էջում նախկին վարչապետը նշել է, որ 2013 թվականին իրենք չեղարկել են այդ պարտադրանքը՝ դա համարելով մանկավարժական մեթոդաբանությանը ոչ հարիր, իսկ այժմ դրա վերականգնմամբ ջուրն են գցվում ավելի վաղ ունեցած ժողովրդավարական ձեռքբերումները:

«Թուրքիայի՝ դժվարին պայքարի արդյունքում ձեռք բերված ժողովրդավարական նվաճումները պետք է խնամքով պահպանվեն: Ժողորդի էներգիան չպետք է վատնվի անջատողական վիճաբանությունների վրա», - ասել էր Դավութօղլուն:

Աղբյուր