Թուրքիայում աճում է կանանց սպանությունների թիվը

2015թ․ մինչ օրս Թուրքիայում 1369 կին է սպանվել։ Թուրքական «Milliyet» պարբերականի թղթակից Ահենք Բայազըթը վիճակագրական տվյալներ է ներկայացրել տղամարդկանց կողմից սպանված կանանց վերաբերյալ։

Ըստ այդմ՝ 2015թ․ Թուրքիայում սպանված կանանց թիվը կազմել է 303, 2016թ․՝ 328, 2017թ․՝ 409, իսկ 2018թ․ 9 ամսում՝ 329։

Այդ դեպքերի թվում հատկապես մեծ աղմուկ են բարձրացրել երիտասարդ աղջիկների ու կանանց սպանությունները։ 2015թ․ փետրվարի 11-ին Մերսինում ավտոբուսի վարորդի կողմից սպանվեց 19-ամյա ուսանողուհի Օզգեջան Ասլանը, այդ դեպքից ընդամենը 8 օր անց Անթալիայում իր ընկերոջ կողմից սպանվեց 22-ամյա Հյուսնե Ասլանը։ Ստամբուլում 17-ամյա ուսանողուհի Հելին Փալանդյոքենը, Մուղլայում 18-ամյա Իփեք Քովանը և Ադանայում 28-ամյա Թյուրքան Սարըքայան սպանվեցին այն տղամարդկանց կողմից, ում իրենք մերժել էին։

2012թ․ Թուրքիան ստորագրել է Կանանց նկատմամբ բռնության և ընտանեկան բռնության կանխարգելման ու դրա դեմ պայքարի մասին Եվրոպայի խորհրդի կոնվենցիան (Ստամբուլի կոնվենցիա), որով ենթադրվում էր, որ երկիրն ավելի արդյունավետ կպայքարի կանանց դեմ ուղղված բռնությունների դեմ։ Բայց, այնուամենայնիվ, վիճակագրությունը ցույց է տալիս, որ այդ պայքարը ոչ միայն ավելի արդյունավետ չի դարձել, այլև բռնությունն ավելի է շատացել, իսկ կանանց սպանությունների թիվը շարունակում է տարեցտարի աճել։

Աղբյուր` Ermenihaber