Ի՞նչ սև կատու է անցել Նիկոլ Փաշինյանի ու Սասուն Միքայելյանի միջև (Տեսանյութ)

Թեև անցած ընտրություններում Հրազդանում բացարձակ հաղթանակ տարավ Սասուն Միքայելյանի որդին, ով նաև տեղական ՔՊ- ի կառույցի ղեկավարն էր, այնուամենայնիվ, նա չկարողացավ հանդես գալ որպես ՔՊ-ի պաշտոնական ներկայացուցիչ, ինչը ցույց է տալիս, թե ինչ ներքին հակասություններ կան Փաշինյանի ու Միքայելյանի միջև: Փաշինյանը հրապարակավ դեմ արտահայտվեց, որ Սասունի որդին առաջադրվի քաղաքապետի թեկնածու, քանզի արտաքուստ այն շատ նման է դառնալու Մանվել Գրիգորյանի օրինակին, երբ վերջինս «հին» Հայաստանում ԵԿՄ-ի նախագահն էր, իսկ նրա որդին` Էջմիածնի քաղաքապետը: Փաստորեն «նոր» Հայաստանը տարբերվելու է նրանով, որ հիմա էլ Սասունն է դառնալու ԵԿՄ-ի նախագահ, իսկ նրա որդին` Հրազդանի քաղաքապետը: Սա նկատում են բոլորը, և բնականաբար, Փաշինյանը չէր ուզենա, որ գոնե այս պահին, երբ իր իշխանությունը դեռ շատ ամուր չէ, նմանվի Սերժ Սարգսյանին: Ահա թե ինչու նրա մոտ ներվ է առաջացել Սասունի հանդեպ: Իսկ վերջինս, իր հերթին, չի հասկանում թե ինչո՞ւ պիտի տարբեր տեսակի «դեղնակտուցներ» այս կամ այն պաշտոնը ստանան, իսկ իրեն չհասնի ոչինչ: Հասկանալի է, որ ԵԿՄ-ի նախագահի պաշտոնը ոչ այնքան արտոնություն է, որքան քաղաքական «թոշակառուի» պաշտոն, որը նույնիսկ վիրավորական է Սասունի համար: 

Բայց Սասունը իր վիրավորանքը չի կարող հրապարակավ արտահայտել, քանզի դրանից շատ բան չի շահի: Եվ դրա պատճառով էլ վիրավորված գայլի պես լռում է, մինչև հասկանա , թե ինչ «նոր» դուռ կարող է բացվել իր համար:
Սասունը հասկանում է, որ ինքը այսօր լուրջ ռեսուրս չունի Փաշինյանին հրապարակավ հակադրվելու համար, իսկ վերջինս էլ հասկանում է, որ Սասունի` իր թիմից հրապարակային դուրս գալը լուրջ իմիջային հարված կարող է դառնալ իր համար: Ահա թե ինչու այսօր կողմերից ոչ մեկին շահավետ չէ իրար դեմ քայլ կատարելը: Սակայն պարզ է նաև, որ այս համատեքստում Փաշինյանի համար անորոշ է դառնում նաև մեկ այլ հարց, ինչքանո՞վ է ճիշտ Սասունին հանձնել եԿՄ-ի նախագահի պաշտոնը: 

Մյուս կողմից, Արամ Զավենիչին Փաշինյանը նույնպես իր հավատարիմ դաշնակից չի համարում:
Այնպես որ, այս թնջուկի հանգուցալուծումը ցույց կտա, թե ինչպիսի զարգացումով կավարտվի Նիկոլի ու Սասունի փոխհարաբերությունների այս բարդ պատմությունը:

Արտակ Հակոբյան