Հունան Պողոսյանի նշանակումը ինձ համար նորմալ էր. Կարեն Քոչարյան

Zham.am-ի հարցազրույցը քաղտեխնոլոգ Կարեն Քոչարյանի հետ:

-Պարո´ն Քոչարյան, կարծիքներ են հնչում, որ արտահերթ խորհրդարանական ընտրություններից հետո մենք կունենանք իշխանական մոնոպոլիա: Ձեր կարծիքը ինչպիսի՞ն է:

-Դա ընդամենը գնահատականի խնդիր է. մեկն ասում է մոնոպոլիա, մյուսը` քաղաքական մեծամասնություն: Մոնոպոլիայի վտանգ ես չեմ տեսնում, հենց այդ մոնոպոլիայից էլ կծնվի ընդդիմություն:

-«Քաղաքացիական պայմանագիր» կուսակցությունը հայտարարեց, որ իրենց կազմում կարող են լինել նաև բարիկադների հակառակ կողմի ներկայացուցիչներ: Ըստ Ձեզ, սա չի՞ առաջացնի հանրության դժգոհությունը:

-Գիտեք, դա անձնական մոտեցում է: Ես, օրինակ, գտնում եմ, որ Վիգեն Սարգսյանի նման կադրին պետական կառավարման մեջ չօգտագործելը հանցագործություն է: Միայն նրա համար, որ նա երկար տարիներ եղել է Սերժ Սարգսյանի իշխանության կազմի մեջ` ասել, որ ինքը իրավունք չունի ոչ մի բանով զբաղվելու` սխալ է: Մեկ ուրիշը` ուրիշ անուն կտա, այստեղ խնդիրը այն է, որ չլինեն այն օդիոս անձիք (Սուրիկ Խաչատրյան, Առաքել Մովսիսյան), որոնք միանշանակ չեն ընդունվում հասարակության կողմից:

-Այս առումով, ինչպե՞ս կգնահատեք Հունան Պողոսյանին` Սյունիքի մարզպետ նշանակելու, Նիկոլ Փաշինյանի որոշումը:

-Ես շատ նորմալ եմ ընդունել, թեև գիտեմ, որ որոշ մարդկանց մոտ դա խնդիր է առաջացրել:

- ԱԺ Հանրապետական խմբակցության պատգամավոր Գևորգ Կոստանյանի` Շանթ հեռուստաընկերության «Հեռանկար» հաղորդմանը տված հարցազրույցը քննարկման թեմա է դարձել համացանցում, ինչպիսին է Ձեր տեսակետը:

-Շատերը գովում են Կոստանյանին, որպես պրոֆեսիոնալ, ես անձնապես երբեք լավ չեմ վերաբերվել, բայց դա չի նշանակում, որ ես հիմա ասում եմ դա լավ է, թե վատ է: Թույլ տվեք չմեկնաբանել, որովհետև շատ սուբյեկտիվ կլինի կարծիքը: 

  Հարցազրույցը վարեց Քրիստինե Աղաբեկյանը