«Ժառանգություն» կուսակցությունը «Լույսի» կամ ԲՀԿ-ի հետ դաշինք կազմելու հարց չի քննարկում. Արմեն Մարտիրոսյան (Տեսանյութ)

Արդեն հայտնի է, որ արտահերթ խորհրդարանական ընտրությունները կկայանան դեկտեմբերի սկզբներին: Կուսակցական ինչպիսի՞ վերաբաշխումներ կլինեն, ովքե՞ր հանդես կգան դաշինքներով ու ի՞նչ զարգացումներ կլինեն, ցույց կտա ժամանակը:

«Ժառանգություն» կուսակցության վարչության նախագահ Արմեն Մարտիրոսյանը Zham.am-ի հետ զրույցում խոսեց իրենց առաջիկա քայլերի և նոր ընտրական օրենսգրքի մասին:

-Պարո´ն Մրտիրոսյան, հայտնի է, որ արտահերթ խորհրդարանական ընտրությունները կկայանան դեկտեմբերին, ձեր կուսակցությունը պատրաստվու՞մ է ընտրություններին և ի՞նչ ձևաչափով:

-Դեկտեմբերին կայանալիք արտահերթ խորհրդարանական ընտրություններին «Ժառանգություն» կուսակցությունը իր ակտիվ մասնակցությունը կունենա, քանի որ երկրում և´ասելիք ունի և´ անելիք, իսկ փորձը, գիտելիքներն ու սկզբունքայնությունը պետք կգան հեղափոխությունը մինչև վերջ կյանքի կոչելու համար: Քննարկումները կուսակցությունում սկսվել են:

_Դուք կոչ եք արել, Նիկոլ Փաշինյանին մեծ դաշինքով մասնակցել ընտրություններին, բայց կարծես նրանք որոշել են կուսակցական դաշինքով չգնալ ընտրությունների: Հնարավո՞ր է դաշինք կազմեք «Լույսի» կամ ԲՀԿ-ի հետ:

-Որևէ դաշինքի տարբերակ այս պահին չի քննարկվում կուսակցությունում և այն բաց է: Ինչ վերաբերում է, Նիկոլ Փաշինյանին ուղղված մեր կոչին, մենք կարծում ենք` ճիշտը հեղափոխությունը կյանքի կոչած ուժերով միասնական ցուցակով մասնակցելն է:

-Ակտիվորեն քննարկում է ընթանում նոր ընտրական օրենսգրքի շուրջ: Ձեր կարծիքով կհասցնեն ընդունե՞լ առաջարկվող փոփոխությունները և, եթե այնուամենայնիվ, հին ընտրական օրենսգրքով կայանան ընտրությունները, ինչպե՞ս կնկալվի այդ հանրության կողմից:

-Մենք աջակցում ենք կառավարությանը այս հարցում և մեր մասնակցությունն ենք ունեցել քննարկումներին` ներկայացնելով մեր առաջարկությունները, չնայած դրանք չեն ընդունվել, այնուամենայնիվ, նոր ընտրական օրենսգիրքը մի քանի քայլ առաջ է նախկինից: Ցանկության դեպքում ընդամենը երկու օր է պետք այդ փոփոխությունները ընդունելու համար, այնուամենայնիվ եթե հին ընտրական օրենսգրքով անցկացվեն ընտրությունները, ապա խորհրդարանում գործող ուժերը ևս մեկ անգամ հարվածի տակ կհայտնվեն հասարակության կողմից: Կարծում եմ, որ խորհրդարանական ուժերը կողմ կքվեարկեն այդփոփոխություններին և ընտրությունները կանցկացվեն նոր ընտրական օրենսգրքով:

Zham.am