Հայկոն հայտնվել է իր իսկ կողմից պատրաստած պոպուլիստական խոստումների թակարդում. Տեսանյութ

Վերջին օրերին լայն տարածում է ստացել Հայկ Մարությանի այն հարցազրույցը, որտեղ նա ակնարկում է, որ վերջին հինգ տարիներին ամեն ինչ թանկացել է, և բնականաբար այդ պրոցեսից զերծ չի կարող մնալ նաև քաղաքային տրանսպորը:

Իր այդ խոսքերից հետո նրան հիշեցրին, որ թե հինգ տարի, և թե այս նախընտրական արշավի ժամանակ, նա տրանսպորտի գնի թանկացման մասին ոչինչ չի ասել: Հայկոն, զգալով որ աղմուկը մեծանում է, ֆեյսբուքյան հայտարարությունով հանդես եկավ, որտեղ նշեց, որ իր խոսքերը ճիշտ չեն հասկացել, և ինքը դեմ է, որ քաղաքային տրանսպորտի գինը թանկանա:

«Ես պաշտոնապես հայտարարում եմ, որ ինչպես 5 տարի առաջ, այնպես էլ հիմա դեմ եմ տրանսպորտի թանկացմանը քաղաքացիների համար: Տրանսպորտի սակագնի ինքնարժեքի բարձրացման դեպքում քաղաքը պետք է լուծի խնդիրն այնպես, որ քաղաքացիների համար տրանսպորտի գինը չթանկանա» ,- նշեց Մարությանը իր ֆեյսբուքյան գրառման մեջ:

Այսպիսով, Հայկոն վախենալով մարդկանց բացասական արձագանքից` ետ պտտեցրեց իր իսկ կողմից արված այն եզրույթը, որ համատարած թանկացումների շարքում տրանսպորտի գինը չի կարող չթանկանալ: Ճիշտ է, նա ճշգրտեց, որ քաղաքացիների համար գինը չի թանկանա, սակայն լուրջ փորձագետները շատ լավ հասկանում են, որ լուրջ կառուցվածքային բարեփոխման արդյունքում, տրանսպորտի գնի բարձրացումը անխուսափելի է: Ճիշտ է, Մարությանը խոստանում է այն կոմպենսացնել քաղաքային բյուջեից, սակայն բյուջեն անսպառ չէ, մանավանդ երկրի կառավարման այս համակարգում, այդ բյուջեն էապես չի կարող մեծանալ: Սակայն երկրի համակարգային փոփոխությունների խոստում , ոչ Մարությանը, ոչ էլ Փաշինյանը հանրությանը չեն տվել: Քաղաքային տրանսպորտը, իրոք, բարեփոխման լուրջ կարիք ունի և այդ բարեփոխումների տրամաբանությունը, որը խոստացել է նաև Հայկոն, հակասում է այն պոպուլիստական մյուս խոստումներին, որի կատարման դեպքում իրենց բարեփոխելու խոստումը օբյեկտիվորեն չի կարող կատարվել:

Այսպիսով, 80 տոկոսի հետևից ընկնելով նրանք խոստացել են այնքան բան, որ դա հակասելու է իրական բարեփոխումների տրամաբանությանը: Այսպիսով, «սև-սպիտակների» կեղծ հեղափոխական պաթոսն ավարտվել է և «սպիտակները» կանգնել են իրական երկընտրանքի առջև. իրենց կողմից գիտակցված ձևով խաբած խոստումների ո՞ր մասից հրաժարվել: Որից էլ որ հրաժարվեն, միևնույն է հասարակական շոկը շատ ցավոտ է լինելու:

Ինչպես ասում են, խորամանկ աղվեսը երկու ոտով է թակարդն ընկնում:

Արտակ Հակոբյան

Լուսանկարը` Sputnik Armenia -ի: