Ապագա խորհրդարանում կլինեն չորս ուժ. ո՞ր ոժերին է ուզում տեսնել Փաշինյանը ապագա ԱԺ-ում

Սկսած 1995 թվականից, Հայաստանում  գործող ղեկավարները, երկրի սահմանադրությունը և օրենսդիր մարմինները միշտ փորձում էին ձևավորել իրենց «հաքին»:

Դա հասկանալի էր, քանզի անցումային գտնվող երկրում, որտեղ դեմոկրատական նորմերը դեռ հաստատված չեն, չափազանց կարևոր է իշխանության կայունության հարցը:

Այս ապագա խորհրդարանի ձևավորման խնդիրը նույնպես կարևոր է Փաշինյանի համար, չնայած նրան, որ ակնհայտ է, որ այս մարմնում, նա ունենալու է բացարձակ մեծամասնություն: Առաջին հայացքից զարմանալի է թվում, թե ինչն է անհանգստացնում Փաշինյանին, չէ՞ որ դեկտեմբերի ընտրությունների արդյունքում, նա չի ունենալու իրական ընդիմություն: Ավելին, Փաշինյանը ցանկանում է գալիք ընտրություններում արձանագրել ավելի բարձր արդյունք, քան Երևանի ավագանու ընտրությունների ժամանակ: Դա կարևոր է նրա համար, որպեսզի փաստի առաջ կանգնեցնի «դրսի» խաղացողներին: Բացի այդ, նա շատ լավ հասկանում է, որ կարճ ժամանակահատվածում հեղափոխական էյֆորիան վերանալու ,է և նա չի ուզում, որ ԱԺ-ից ծնվի իրական ընդիմություն:

Ճիշտ է, երկրի իմիջի համար դա լավ չի լինի, սակայն իշխանության հարցը նրա համար ավելի կարևոր է:

Եվ այսպես, ենթադրենք նա հավաքում է ձայների 85-90 տոկոսը: Այդ դեպքում մնացած ո՞ր ուժերին է ուզում տեսնել Փաժինյանը ապագա ԱԺ-ում:

Ո՞րն է Փաշինյանի ծրագիրը այս հարցում

Հասկանալի է, որ եթե նա հավաքում է քվեների 85 տոկոսը, ապա ոչ մի այլ ուժ կարող է չկարողանա անցնել 4 կամ 5 տոկոսի շեմը: Ահա թե ինչու նոր օրենսգրքով պարտադիր 4 ուժ պիտի ներկայացված լինեն ապագա ԱԺ-ում, դեմոկրատական շղարշը պահպանելու համար: Եթե ընտրությունները անցկացվեն հին օրենսգրքով, ապա այդ ուժերը կլինեն երեքը:

Եթե ընտրությունները անցկացվեն հին օրենսգրքով, ապա, ըստ Փաշինյանի, իր «այլընտրանքները» պիտի լինեն «Լույսն» ու ԲՀԿ-ն: Վերջինիս հետ հուշագրի կնքումը հենց դա էր նշանակում: «Լույսի» հետ դրա անհրաժեշտությունը չկա, քանզի այս ուժը նրա «պահեստային անիվն է» և նույնիսկ «այլընտրանքի» դերին էլ չի հավակնում: Ինչպես նեղացած անկեղծանում է Արամ Զավենիչը, նրանք Փաշինյանի հետ չեն, որովհետև վերջինս դա չի ցանկացել:

«Խորթ զավակի» դերում «Լույսը» իրենից ոչ մի բան չի ներկայացնելու ապագա ԱԺ-ում:

Եթե ընտրությունները անցկացվեն նոր օրենսգրքով, ապա չորրորդ տեղը կարող է զբաղեցնել «Սասնա Ծռերը»: Այս հարցում Փաշինյանի միակ խնդիրը պիտի լինի այն, որ սրանք փոքրամասնություններից 2-րդ տեղը չգրավեն: Պատճառը նույնպես հայտնի է, սրանք ԲՀԿ-ի ու «Լույսի» նման «այլընտրանք» չեն պատրաստվում դառնալ և ուրեմն կարևոր է, որ նրանք ավելի քիչ ձայն հավաքեն, քան՝ ԲՀԿ-ն կամ «Լույսը»:

Այսպիսով, Փաշինյանի ցանկությունները ապագա խորհրդարանի մասով հայտնի է, նա դեկտեմբերին կունենա «գրպանային» խորհրդարան, որից հետո կսկսի իր ձեռքի տակ վերցնել նաև երկրի դատաիրավական համակարգը: Այնուհետև հերթը կհասնի սեփականության վերաձևման խնդիրներին, իսկ վերջում կհաստատի ամբողջական մենշխանություն:

Արտակ Հակոբյան