Ի՞նչ են խոսել Փաշինյանն ու Ծառուկյանը հանդիպման ժամանակ

Այսօր Փաշինյանը լրագրողներին հաղորդեց այն մասին, որ երեկ, կիրակի օրը, հանդիպել է Ծառուկյանին և քննարկել ներկա ընթացիկ գործընթացներն ու մասնավորապես արտահերթ ընտրությունների հարցը: Փաշինյանը չմանրամասնեց, թե ինչ եզրակացության են եկել և եկել են, թե՝ ոչ: Նա պարզապես նշեց, որ բանակցությունները շարունակվելու են, և կա պատկերացումների ընդհանուր ըմբռնում, իսկ թե ինչ է դա նշանակում, նա չպարզաբանեց: Վարչապետը նշեց , որ բանակցություններ է վարելու նաև ՀՅԴ-ի հետ:

Այսպիսով, Փաշինյանը որոշել է կրկին տարանջատել այս երկու ուժերին ՀՀԿ-ից, որպեսզի կարողանա հասնել իր նպատակին, այն է՝ անցկացնել ընտրությունները այս տարի: Իսկ որ դա դժվար խնդիր է, փաստում է այն հանգամանքը, որ այդ գաղափարը մերժում է ոչ միայն ՀՀկ-ն, այլև՝ ԲՀԿ-ն ու ՀՅԴ-ն: Ավելին, Փաշինյանի կողմնակիցները մտավախություն ունեն, որ ԱԺ-ի լուծարումը չպետք է լինի վարչապետի հրաժարականի միջոցով, քանզի չի բացառվում, որ այդ դեպքում ՀՀԿ-ն իր վարչապետն առաջարկի ու վիժեցնի ԱԺ-ի լուծարումը այդ ձևով: Այսօր Փաշինյանի գլխավոր նպատակն է դարձել՝ տարանջատել ԲՀԿ-ին ու ՀՅԴ-ին ՀՀԿ-ից, որպեսզի վերջիններս միայնակ մնան և ռիսկի չգնան՝  վարչապետի թեկնածու առաջադրել: Այսօր ճեպազրույցի ժամանակ Սպարտակ Սեյրանյանը նշեց, որ ՀՅԴ-ն այդպիսի մտադրություն չունի, իր վարչապետի թեքնածուի չի առաջադրի: Իր հերթին նույն ճեպազրույցի ժամանակ Լենա Նազարյանը կոչ արեց մյուս ուժերին նույնպես ճշգրտել իրենց դիրքորոշումները այս հարցում:

Ֆրանկոֆոնիայի համաժողովը, իհարկե, լավ առիթ չէ քաղաքական կյանքը սրելու համար, և դրա համար էլ Փաշինյանը որոշել է այդ առիթը օգտագործել կուլիսային բանակցությունների համար:

Իսկ ինչպես կհանգուցալուծվի այս խնդիրը, ցույց կտա ժամանակը:
Պարզ է մեկ բան, այստեղ հաղթող է դուրս գալու այն կողմը, ով ինքն է թելադրելու քաղաքական գործընթացների զարգացման տրամաբանությունը:

Արտակ Հակոբյան