Ինչո՞ւ է ավագանու անդամ Արթուր Իսպիրյանը «գիժ անտեր» անվանել որդեկորույս մորը․ մանրամասնում է

Հոկտեմբերի 4-ին որդեկուրույս Ռուզաննա Ադալանյանը, ով տարիներ շարունակ պայքարում է որդու սպանության հանգամանքները բացահայտելու համար Կառավարության շենքի մոտ պահանջել է վարչապետ Նիկոլ Փաշինյանի հետ հանդիպում՝ ասելով, որ վերջինս իրենից վախենում է, դրա համար է հետևի մուտքից շենք մտնում.«Լրիվ Սերժի համակարգն է: Ի՞նչ ունի մեզանից թաքցնելու: Նիկոլն ինքը հակահեղափոխական է»,- հայտարարել էր զայրացած կինը:

Կնոջ բողոքի մասին պատմող կայքերից մեկի հրապարակման տակ Երևանի ավագանու «Իմ քայլը» դաշինքի ցուցակով ավագանի ընտրված Արթուր Իսպիրյանը մեկնաբանություն է թողել․ «Գիժ անտեր»:

Armdaily.am-ը կատարվածի առիթով մեկնաբանություն խնդրեց Արթուր Իսպիրյանից։ Ներկայացնում ենք զրույցն ամբողջությամբ․

-Կմեկնաբանեք, թե ինչո՞ւ եք տարիներ շարունակ, միակ որդու սպանությունը բացահայտելու պահանջով կառավարության շենքի մոտ աղմուկ բարձրացրած կնոջ մասով, կայքերից մեկի հրապարակման տակ գրել՝ գիժ անտեր։

-Ես չեմ հասկանում այդ կինը ո՞վ է։

-Պարոն Իսպիրյան, այդ կինը տարիներ շարունակ պայքարում է որդու մահվան հանգամանքները բացահայտելու համար, հայ կին է, որդեկորույս․․․

-Ես այդ մասին չեմ իմացել, որ որդի է կորցրել։ Ուղղակի զարմանում եմ, որ այդքան ուշադիր եք իմ գրածների հանդեպ։ Էդպիսի երկու միլիոն գրառում կա, ի՞նչ հիմա, բոլորին պետք է զանգեք ու հերթով հարցնեք։

-Դուք «Իմ քայլը» դաշինքի ավագանու անդամ եք, հանրային դեմք ու դա է պատճառը, որ մարդիկ առանձնակի են դիտարկում ձեր գրառումը։

-Ես կնայեմ արձագանքները ու ավելի ուշ կանդրադառնամ կատարվածին։

Աղբյուրը՝ Armdaily.am