Ո՞ր քաղաքական ուժին են որոշել աջակցել այս ընտրություններում Ռոբերտ Քոչարյանն ու Սերժ Սարգսյանը

Շատերը կարող են զարմանալ այս հարցադրմանը, չէ որ Քոչարյանը արդեն 10 տարուց ավել է ինչ իշխանության մեջ չէ, իսկ Սերժ Սարգսյանը այն կորցրեց այս տարվա ապրիլին:

Սակայն բանից պարզվում է այս ընտրությունների գլխավոր մրցակիցներն են վերը նշված գործիչները:

Օրինակ Փաշինյանի կողմնակիցները համոզված են, որ ԲՀԿ-ի հետևում կանգնած է անձամբ Քոչարյանը: Վերջինս Ծառուկյանի գործնկերն է և ուրեմն Նաիրա Զոհրաբյանը փաստացի աջակցվում է Քոչարյանի կողմից, քանզի գործում է «իմ բարեկամի բարեկամը իմ բարեկամն է» հայտնի սկզբունքը: Ի պատասխան դրա, ԲՀԿ-ում նշում են, թե Փաշինյանը ուղղորդվում է Սերժ Սարգսյանի կողմից, քանզի «Իմ քայլը» դաշինքի ցուցակում բազմաթիվ են 3-րդ նախագահի կողմնակիցները: Օրինակ հայտնի բլոգեր Իզաբելլա Աբգարյանը, ով աշխատել է Սերժ Սարգսյանի մոտ , որպես գաղափարական մարտիկ-բլոգեր ընդեմ Քոչարյանի, Տեր-Պետրոսյանի, Ծառւկյանի, եռյակի, քառյակի և այլն, այսինքն Սերժ Սարգսյանի բոլոր հակառակորդների դեմ:

Սակայն պարզվում է միայն այս հիմնական ուժերը չեն ուղղորդվում հայտնի «զույգի» կողմից: Պարզվում է «Լույս» դաշինքը նույնպես ուղղորդվում է ՀՀԿ-ի և Սերժ Սարգսյանի կողմից: Փաստորեն ստացվում է, որ նույնիսկ հեղափոխությունից 5 ամիս անց երկրի քաղաքական դաշտը գտնվում է այս հայտնի «զույգի» ձեռքում:

Եթե դա համապատասխանում է իրականությանը, ապա ներկայիս քաղաքական ուժերը գրոշի արժեք չունեն, իսկ այս «զույգն» էլ խաղից դուրս չէ , ավելին, նրանք քաղաքական դաշտի հիմնական խաղացողներն են : Իսկ եթե դա այդպես չէ և հայտնի «զույգը» «խաղի մեջ չէ», ապա ներկայիս քաղաքական ուժերը բարդույթավորված են և զբաղված են շարքային «աճպարարությամբ», որից լրջության հոտ անգամ չի գալիս: Հանուն արդարության պետք է նշել, որ այս «էժանագին» արշավի գլխավոր մեղավորը Փաշինյանի թիմն է, ով դաշտը բաժանեց «սևերի ու սպիտակների», իսկ ԲՀԿ-ն ու «Լույսը» ստիպված էին պատասխանում իրենց հանդեպ մեղադրանքներին:

Անկախ ամեն ինչից այս ընտրարշավը ցույց տվեց, որ «Նոր Հայաստանից» խոսողները ամենևին էլ «նոր» տեսակի գործիչներ չեն, այլ հնամաշ են և անցյալի արժեքներով ապրող, որից «հին» հոտ է գալիս , ես կասեի «հնագույն»:

Սա է իրականությունը:

Դավիթ Մկրտչյան