Ինչո՞ւ բերման ենթարկվեց Խաչատուր Սուքիասյանի թիկնազորը, կամ Бей своих чтобы чужие боялись

Օլիգարխների թիկնազորների զինաթափման վերաբերյալ Նիկոլ Փաշինյանի հայտնի ելույթից հետո շատերը զարմացան, որ այդ շարքում բերման էին ենթարկել նաև Խաչատուր Սուքիասյանի թիկնազորին: Շատերի մոտ զարմանք էր առաջացել այդ կապակցությամբ, քանի որ Սուքիասյանը միշտ համարվել է, այսպես ասած, «ճիշտ օլիգարխ», ով քիչ հրապարակային կապեր է ունեցել նախկին իշխանությունների հետ, իսկ 2008-ին էլ համարձակվել է ընդդիմության կողմն անցնել, ու նաև մտերմիկ հարաբերություններ է միշտ ունեցել Փաշինյանի հետ:

Թողնենք մի կողմ, որ Սուքիասյանը երբեք ճնշված չի եղել նախկին իշխանությունների կողմից, եթե իհարկե չհաշվենք 2008-ից հետո «Նոյ» ջրերի ու «ֆիլիպ Մորիսի» պատմությունները: Բայց դրանք առանձնահատուկ դեպքեր էին: Չմոռանանք, որ մինչև 2008-ը Սուքիասյանի բիզնես կայսրությունը իրեն հեչ էլ վատ չէր զգում: Բերենք ընդամենը մեկ օրինակ. նրա բանկում էին գտնվում այն ժամանակվա ՊԵԿ-ի հաշիվները, բացի դրանից այն ժամանակվա նախագահականի աշխատողները հենց Սուքիասյանի բանկից էին ստանում իրենց աշխատավարձերը:

Բայց այս ամենը արդեն պատմություն է, և Սուքիասյանի «հալածյալի» կերպարը արդեն չի աշխատում: Բացի այդ, Փաշինյանին այլևս անհրաժեշտ չէ ընդգծել իր կապերը Սուքիասյանի հետ, քանզի վերջինս, այնուամենայնիվ, օլիգարխիայի դասին պատկանող անձ է: Իսկ հպարտ քաղաքացիների համար «լավ և վատ» օլիգարխներ չկան: Այս ամենին գումարած՝ իր երբեմն մտերմիկ օլիգարխի թիկնազորին բերման ենթարկելով Փաշինյանը մյուս օլիգարխներին զգուշացնող մեսիջ է ուղարկում ռուսական հայտնի ասացվածքի ձևով. «бей своих чтобы чужие боялись»:

Այնպես որ, Սուքիասյանի թիքնազորին բերման ենթարկելով՝ Փաշինյանը ուզում է վախեցնել մյուս օլիգարխներին, որ նրանց ներում - բեկում չի լինելու:

Սա է իրականությունը:

Արտակ Հակոբյան