Ինչու՞ Նիկոլ Փաշինյանը քաղաքական դաշտը բաժանեց սևերի ու սպիտակների

Երբ ընտրարշավից առաջ հայտնվեց Հայկոի տեսագրությունը «սևերի ու սպիտակների» վերաբերյալ, քաղաքական դաշտը ցնցվեց: Միանգամից հիշեցին ՀՀՇ-ի ժամանակները, Շարմազանովի հայտնի «Մելիք-Ադամյանի» թեզը: Դրա համար էլ ՔՊ-ի անդամները միանգամից որոշեցին տարանջատվել Հայկոյի այդ խոսքերից՝ վերագրելով այս ամենը Հայկոյի անփորձությանը: Սակայն հանրահավաքի հենց առաջին օրը պարզ դարձավ, որ դա անփորձության արդյունք չէր, այլ գիտակցված քաղաքական ուղենիշ: Ընդ որում, այդ ուղենիշի իրական հեղինակը ոչ թե Հայկոն էր, այլ հենց ինքը՝ Փաշինյանը: Վերջինս արդեն հենց հանրահավաքի ժամանակ վերահաստատեց այդ դիրքորոշումը, նշելով, որ բացի ՔՊ-ի թեքնածուից մյուսները ուղղակի կամ անուղղակի ներկայացնում են «հակահեղափոխության» շահերը:

Սա արդեն երկրորդ շոկն էր, որ ապրեց երկրի քաղաքական վերնախավը, սակայն այդ շոկից մինչ այսօր դուրս չի եկել:

Շատ քաղաքագետների կարծիքով այս քայլով Փաշինյանը կնոսրացնի իր էլեկտորատը: Հավանաբար այդպես են մտածում նաև այս ընտրարշավին մասնակցող 11 քաղաքական ուժերի ներկայացուցիչները: Մինչդեռ իրականում, ճիշտ հակառակը, Փաշինյանը գիտակցված գնաց այս քայլին, որպեսզի իր շուրջ կոնսոլիդացնի իր կողմնակիցներին: Ինքը իհարկե կորցրեց կիրթ զանգվածի զգալի մասին, քանզի բոլշևիկյան «ով մեր հետ չէ, մեր դեմ է» հայտնի սկզբունքը միշտ էլ վանել է նորմալ մտածող մարդկանց: Սակայն այդ սկզբունքը կոնսոլիդացնում է ցածր կրթական ցենզ ունեցող մարդկանց, իսկ դրանք քիչ չեն այսօրվա Հայաստանում: Իսկ Փաշինյանին այսօր օդի ու ջրի պես անհրաժեշտ է բացարձակ հաղթանակ: Ահա թե ինչու նա գնաց հանրությունը «սև-սպիտակի» բաժանող բոլշևիկյան ճանապարհով:

Իհարկե նրան կարող էր հակադարձել այս 11 ուժերից որև է մեկը, և միանգամից այդ ուժը կդառնար Փաշինյանի հիմնական մրցակիցը: Սակայն դա չկատարվեց, որովհետև այդ 11 ուժերից ոչ ոք համարձակություն չունեցավ հանրության առավել լուրջ շրջանակներին համախմբել իր շուրջ, ինչը հուշում է, որ գործ ունենք քաղաքականապես թերզարգացած զանգվածների հետ: Պարզվեց, որ ապրիլյան թավշյա հեղափոխությունից հետո քաղաքական արժեզրկման է ենթարկվել ոչ միայն ՀՀԿ-ն, այլև ողջ քաղաքական դաշտը: Այս պարագայում դիրքային մեծ առավելություն են ստանում, բնականաբար, Փաշինյանը և իր թիմը:

Սակայն այս իրավիճակը երկրի համար դառնում է վտանգավոր, քանզի ապրիլյան փոփոխությունները նրա համար չէին, որ երկրում մեկ մենաշնորհը փոփոխվեր մյուսով՝ իր բոլոր բացասական հետևանքներով:

Արտակ Հակոբյան