ՀՀ շրջաններից մեկի եւ լիտվական Մաժեյկյուի միջեւ համագործակցություն կհաստատվի. ՀՀ դեսպան

Լիտվայում ՀՀ դեսպան Տիգրան Մկրտչյանը փետրվարի 10-ին այցելել է Լիտվայի Մաժեյկյուի շրջան, որտեղ հանդիպում ունեցավ Մաժեյկյուի քաղաքապետ Անտանաս Տենիսի հետ։

Հանդիպման ընթացքում քննարկվեցին Հայաստանի եւ Լիտվայի միջեւ ապակենտրոնացված համագործակցության հեռանկարները, փորձի փոխանակման հնարավորությունը՝ տնտեսության զարգացման, զբոսաշրջության աճի ապահովման, առեւտրային եւ մշակութային կապերի հաստատման, ծառայությունների մատուցման եւ այլ բնագավառներում։

Դեսպան Մկրտչյանը նշեց, որ հետամուտ է լինելու, որպեսզի մոտ ապագայում Հայաստանի շրջաններից մեկի եւ Մաժեյկյուի միջեւ համագործակցություն հաստատվի։

Զրուցակիցները կարեւորեցին գործարար ոլորտի ներկայացուցիչների ներգրավվածությունը քաղաքապետերի եւ մարզպետերի հնարավոր փոխայցելությունների շրջանակներում։

Հանդիպմանը մասնակցեց նաեւ Լիտվայի Սեյմասի (խորհրդարան) «Օրենք եւ արդարություն կուսակցության» եւ Սեյմասում հայ-լիտվական բարեկամական խմբի անդամ, Մաժեյկյուի շրջանը ներկայացնող պատգամավոր Կեշտուտիս Բարտկյավիչյուսը։

Նշենք, որ Մաժեյկյուն գտնվում է Լիտվայի հյուսիս-արեւմտյան հատվածում։ Բնակչությամբ՝ 8-րդ քաղաքն է, շուրջ 57 հազար բնակչությամբ։ Մաժեյկյուի տնտեսության կարեւորագույն ոլորտներից են սննդարդյունաբերությունը, մետալուրգիան, փայտագործությունը։