Օֆշորային ընկերությունը վերահսկում է Հայաստանի հանքարդյունաբերական 17 ընկերություն․ հարուցվել է քրեական գործ

Հանքարյունաբերության ոլորտում Տնտեսական մրցակցության պաշտպանության պետական հանձնաժողովի իրականացրած ուսումնասիրությունների արդյունքում Քննչական կոմիտերում քրեական գործ է հարուցվել:

Ըստ գործի նյութերի՝ հանքարդյունաբերությամբ և երկրաբանահետախուզական աշխատանքներով զբաղվող հայաստանյան 19 ընկերությունների բաժնետոմսերը տարբեր ժամանակներում ձեռք են բերվել մի քանի անձանց և կազմակերպությունների կողմից ու վաճառվել Կայմանյան կղզիներում գտնվող կազմակերպություններին: Ընդ որում՝ 17 ընկերության բաժնետոմս վաճառվել է մեկ արտասահմանյան ընկերության:

«Մենք այստեղ ռիսկեր ենք տեսնում այն տեսանկյունից, որ հնարավոր է, որ փաստացի շուկայի հիմնական մասը կառավարվի մեկ ընկերության կողմից և այստեղ նաև մրցակցության սահմանափակում կարող է տեղի ունենալ», - «Ազատության» հետ զրույցում ասաց Տնտեսական մրցակցության պաշտպանության պետական հանձնաժողովի վերլուծության վարչության պետ Գնել Ալավերդյանը: - «Այդ իսկ պատճառով հանձնաժողովը կարծում է, որ այստեղ վերահսկողական գործիքներ են անհրաժեշտ, որպեսզի հնարավորինս թույլ չտրվի այդպիսի գործարքների իրականացումը և դրա հետևանքով մրցակցության սահմանափակում տեղի չունենա»:

Ե՛վ Տնտեսական մրցակցության պաշտպանության կոմիտեն, և՛ Քննչական կոմիտեն առայժմ չեն հաղորդում, թե խոսքը որ ընկերության մասին է՝ պատճառաբանելով, թե դա կխոչընդոտի քննությանը:

ՏՄՄՊՀ ներկայացուցիչ Գնել Ալավերդյանը հավելում է՝ իրավապահ մարմինների գործողությունների շնորհիվ պետք է պազվի՝ ինչ ճանապարհներով են մեկ ընկերության տիրապետության տակ հայտնվել բազմաթիվ ընկերություններ. - «Ի դեպ, նշեմ, որ կան ևս 13 ընկերություններ, որոնք այս պահի դրությամբ պատկանում են այդ միջնորդ ընկերություններին: Հնարավոր է՝ այդ ընկերությունները նույնպես արժանանան նույն ճակատագրին, այսինքն՝ դրանց սեփականատերերը հայտնվեն մեկ ընկերության տիրապետության ներքո: Այնուհանդերձ նշեմ, որ բոլոր գործարքները իրականացվել է պետական բոլոր մարմիններում գրանցման միջոցով, այսինքն՝ դրանք օֆիցիալ գործարքներ են։ Եվ այս տեսանկյունից մեզ մտահոգում է այդ օրինաչափության խնդիրը, միտումը, որ այս ընկերությունները ինչ-ինչ ճանապարհներով հայտնվում են մեկ ընկերության տիրապետության կամ կառավարման ներքո»:

Քննչական կոմիտեից «Ազատությանը» փոխանցեցին՝ այս պահին այլ մանրամասներ չեն կարող հաղորդել, կատարվում են մեծածավալ ակտիվ քննչական գործողություններ։