Ի՞նչ նոր մեսիջ է ուղարկում Սերժ Սարգսյանը Նիկոլ Փաշինյանին. Տեսանյութ

ՀՀԿ ԳՄ աշխատանքներին ընդառաջ, Դավիթ Հարությունյանի խոսքերն այն մասին, որ ՀՀԿ-ն նոր իշխանությունների հետ պատրաստ է քննարկել արտահերթ խորհրդարանական ընտրությունների հարցը, կարելի է փոքրիկ սենսացիա համարել, քանզի մինչ այդ այս կուսակցության ներկայացուցիչները՝ Վահրամ Բաղդասարյանը, Էդուարդ Շարմազանովը և այլն, նշում էին, որ արտահերթ խորհրդարանական ընտրութկյուններ անցկացնելու իմաստ չկա: Եվ ահա՝ այսպիսի կտրուկ փոփոխություն: Ավելին, Դավիթ Հարությունյանը հատուկ ընդգծեց, որ ՀՀԿ-ն պատրաստ է մասնակցել նոր ընտրական օրենսգրքի ընդունման աշխատանքներին՝ հատուկ շեշտելով երկու դրույթ. միասնական էլեկտրոնային համակարգ ստեղծելու անհրաժեշտությունը և ընտրողների ցուցակի մաքրումը: 

Դավիթ Հարությունյանը առաջ գնաց և նույնիսկ բաց համարեց ռեյտինգային համակարգի վերացման խնդիրը: Այսպիսով Դավիթ Հարությունյանը ցույց տվեց, որ ՀՀԿ-ն պատրաստ է արմատապես փոխվել և ինտեգրվել նոր իրողությունների: 

Անշուշտ, Դավիթ Հարությունյանի այս խոսքերը ողջունելի են, մանավանդ որ ընդամենը օրեր առաջ այս կուսակցության դեմքերը բոլորովին այլ հռետորաբանությամբ էին հանդես գալիս: 

Ի՞նչ կարող է նշանակել սա, կհարցնի շարքային ընթերցողը: Բոլորի համար պարզ է, որ այս կուսակցության միակ և անփոխարինելի առաջնորդը Սերժ Սարգսյանն է: Եվ նա չհեռացավ իր այս պաշտոնից, որպեսզի ՀՀԿ-ն չփլուզվի, ինչի վտանգն ակներև էր: Մյուս կողմից, պարզ է, որ Սերժ Սարգսյանն իր դեմքով այլևս հրապարակավ հանդես չի գա՝ երկար ժամանակ, քանզի շատ լավ է հասկանում, թե ինչ արձագանք կստանա հանրության կողմից:

Մյուս կողմից, Շարմազանովի և Վահրամ Բաղդասարյանի ամեն մի արձագանք վատ է ընկալվում հանրության կողմից, դա էլ է հասկանում Սերժ Սարգսյանը: 

Ահա թե ինչու նա խաղի մեջ է մտցնում համեմատաբար ավելի ընկալելի գործչի՝ ի դեմս Դավիթ Հարությունյանի, ով նախկինում էլ օդիոզ գործիչ չէր համարվում: Եվ պատահական չէ, որ այս դրական մեսիջները հենց Դավիթ Հարությունյանի շուրթերով է հնչեցվում: 

Սրանով Սերժ Սարգսյանը փորձում է մեսիջ ուղարկել Նիկոլ Փաշինյանին, որ ՀՀԿ-ն պատրաստ է կոմպրոմիսի գնալ նոր իշխանությունների հետ և որպես պատասխան ակնկալում է, որ նոր իշխանությունը չի օգտագործի իր քաղաքական մահակը՝ ՀՀԿ-ական կառավարման ողջ համակարգը կազմաքանդելու համար:

Արտակ Հակոբյան