Թավշյա հեղափոխությունը տեղի ունեցավ, քանի որ մարդիկ հոգնել էին հիմարի դերում լինելուց

Թավշյա հեղափոխությունը տեղի ունեցավ, քանի որ նախկին իշխանությունը ժողովրդին հիմարի տեղ էր դնում և շահագործում էր,- նշում է նախկին ՀՀ Մաքասային Վարչության պետի տեղակալ, ԱԿՎՄ հասարակական կազմակերպության նախագահ Միհրան Մովսիսյանը: Մեր այս մասնավոր զրույցը այս խոսքից հետո վերածվեց հարցազրույցի:

- Պարոն Մովսիսյան ինչո՞ւ եղավ այս ամենը:

- Երբ վերլուծում ենք Սերժ Սարգսյանի նախագահական գործունեության ժամկետը, ապա տեսնում ենք, որ վերջինիս կողմից իրականացված ոչ ճիշտ կադրային քաղաքականության արդյունք է այս ամենը: Սրան պետք է հավելել նաև ժողովրդից տարանջատվելու կործանարար քաղաքականությունը, որը որդեգրել էր ՀՀ երրորդ նախագահը: Մարդիկ արդեն ձանձրացել էին երկրում խնամիական, բարեկամական հարաբերությունների վրա հաստատված կադրային նշանակումներից: Եթե այսօր ոմանք քննադատում են Նիկոլ Փաշինյանի կողմից հաստատված ՀՀ ոստիկանության պետի և ԱԱԾ-ի տնօրենի նշանակումները , ապա մոռացել են, որ ժամանակին Սերժ Սարգսյանը ԱԱԾ-ի տնօրեն նշանակեց Գ.Կուտոյանին, ում կարելի է ասել, բերեց «փողոցից»: Նշանակել ԱԱԾ-ի տնօրեն մեկին, ով որևէ կապ չուներ ազգային անվտանգության հետ, բացի Սերժ Սարգսյանի անձին ծառայելուց:

- Իսկ ի՞նչ կասեք քաղբանտարկյալների հետ կապված խնդրին: Ժողովրդի մի հատված համոզված է, որ Սամվել Բաբայանի, Սասնա Ծռերի գործը փորձում են ժամանակի մեջ «ջրել», չփոխելով նրանց խափանման միջոցը: 

- Իհարկե քաղբանտարկյալների խնդիրը ցավոտ հարց է, որին պետք է անհապաղ լուծում տրվի: Հասկանալի է, որ վարչապետ նշանակվելուց անմիջապես հետո, այն հնարավոր չէր արագ լուծել: Բայց և այնպես, այսօր բերդերում կան ազատամարտիկներ, ի դեմս Սասնա Ծռերի անդամների, Սամվել Բաբայանի, Ժիրայր Սէֆիլյանին և այլն: Նրանց հարցը մանրակրկիտ ուսումնասիրության կարիք ունի: Որպես իրավաբան կարող եմ ասել, որ Սասնա Ծռերի գործով ևս կարելի է փոխել խափանման միջոցը: Չմոռանանք, որ վերջիններս կամավոր են հանձնվել: Համոզված եմ, որ նրանք դատական նիստերին ՀՀ քաղաքացուն վայել ձևով կմասնակցեն, և հասարակության համար նրանք վտանգ չեն ներկայացնում: Նույնը Սամվել Բաբայանի, Ժիրայն Սէֆիլյանի գործերն են:

- Այո, բայց արդարադատության նախարար Արտակ Զեյնալյանը հայտարարել է, որ պետք է ուսումնասիրել հարցերը և իրավական շրջանակներում գտնել հարցի լուծման մեխանիզմերը: Իսկ վարչապետը ասել է, որ դատական համակարգը անկախ մարմին է:

- Ասեմ այսպես, այսօր շատ բարդ իրավիճակ է, ժողովրդը, մանրադիտակի տակ հետևում է Նիկոլ Փաշինյանի և նրա կառավարության քայլերին: Այո, գլխավոր դատախազը հայտարարեց, որ չունենք քաղբանտարկյալներ: Վարչապետը իր հերթին հայտարարել էր, որ՝ ունենք: Ես չեմ կարծում և չեմ ուզում մտածել, որ այսօրվա քաղբանտարկյալների հարցը չի լուծվի: Հուսով եմ, որ այն անձինք, ովքեր այսօր անազատության մեջ են, կարճ ժամանակահատվածում ազատության մեջ կհայտնվեն՝ օրենքի գերակայության հիման վրա:

- Ինչու՞ Սերժ Սարգսյանի ժամանակ չէիք ասում, որ օրինակ Կուտոյանը լավ կադր չէ, կամ չէիք բարձրաձայնում եղած խնդիրները: Չէ որ այդ ժամանակ Դուք ազգային անվտանգության սպան էիք և ճանանչված անձ:

- Ճիշտ եք ասում, սակայն հիշեցնեմ, որ Սերժ Սարգսյանի իշխանության ժամանակ ես անգամ էլեկտրիկի պաշտոն չեմ զբաղեցրել: Իսկ եթե այդ ժամանակահատվածից էլ հետ գնանք և իմ մասին խոսեմ երրորդ դեմքով, ապա կարող եմ ասել, որ Միհրան Մովսիսյանը այն մարդկանցից մեկն էր, որ հոկտեմբերի 27-ի դեպքից հետո, դեկտեմբերի 6-ին մեկ ամիս պահվեց ազգային անվտանգության նկուղում: Դուրս գալուց անմիջապես հետո հայտարարեցի, որ Սերժ Սարգսյանը չսատարեց ազգային անվտանգության իր աշխատակցի: Համոզված եմ, որ այժմ և հոկտեմբերի 27-ի և մարտի 1-ի դեպքերի վրա լույս կսփռվի: Չի կարող պատահել, որ այդ գործերով համապատասխան մարմինները չզբաղվեն, բացառվում է, քանի որ դրանից տուժածներից մեկն էլ Նիկոլ Փաշինյանն է:

- Եթե հոկտեմբերի 27-ի գործով զբաղվեն, ապա ըստ Ձեզ ո՞վ կտուժի:

- Չեմ կարող ասել, թե ով կտուժի: Այդ գործի բացահայտումը այսօր ավելի քան անհրաժեշտ է մեր ժողովրդին, քանի որ դրանից տուժեց մեր պետությունը:

Զրուցեց Ժասմին Վիլյանը